Sýretterdi túsirgen Erlan OMAR
Igi dástúrge aınalǵan alqaly jıynnyń ashylý saltanatyna Qazaqstan Respýblıkasynyń Memlekettik hatshysy Gúlshara Ábdiqalyqova men Túrki keńesiniń qurýshy Bas xatshysy Halıl Aqynjy, Túrkııa Premer-mınıstriniń Bas keńesshisi, professor Aıgún Attar, Túrkııa IýNESKO Ulttyq komıssııasynyń tóraǵasy, professor О́jal Oǵyz, Túrik Til Qurylymynyń basshysy, professor Mustafa Kachalın, Túrki keńesi Bas xatshysynyń orynbasary О́mer Qojaman, Túrkııa Jýrnalıster federasııasynyń basshysy Mexmet Alı Dım syndy halyqaralyq uıym basshylary men ókilderi qatysyp jatyr.
Bıylǵy forým Astana qalasynyń 20 jyldyq merekesi men Túrkistannyń aqıyq aqyny Maǵjannyń 125 jyldyǵyna, Shyńǵys Aıtmatovtyń 90 jyldyǵyna, Ázerbaıjan Halyq Respýblıkasynyń 100 jyldyǵyna arnalyp otyr. Jıynnyń negizgi maqsaty - Uly Dala qundylyqtarynyń adamzat órkenıeti damýyndaǵy orny men mańyzyn paıymdaý. Sonymen qatar qazirgi zamanǵy gýmanıtarlyq ǵylymdardyń damý úrdisterin saralaı otyryp, túrki álemin zertteý salasyndaǵy tájirıbeni jınaqtap, ıdeıalarmen almasý jáne irgeli baǵyttardy anyqtaý kózdelgen.
Ashylý saltanatyn quttyqtaý sózimen ashqan Qazaqstan Respýblıkasynyń Memlekettik hatshysy Gúlshara Ábdiqalyqova álem órkenıetindegi Túrki mádenı murasyn aıshyqtaýda álem ǵalymdary bas qosqan forýmda kóteriletin mindetter men taqyryptar aýqymdylyǵy týrasynda aıtyp ótti.
«Astanada álemniń jıyrmaǵa jýyq elinen kelgen ǵalymdar bas qosyp, osymen úshinshi ret uıymdastyrylyp otyrǵan «Uly dala» gýmanıtarlyq ǵylymı forýmyna qosh keldińizder. Bas qalamyzdyń ǵylymı jáne ıntellektýaldyq ortalyq retinde ıgi yqpalyn tıgizip otyrǵan ǵylymı forým qordalanǵan ǵylymı máselelerdi sheshýde tyń konseptýaldy sheshimder beretinine senimdimin», – degen ol forým jumysyna sáttilik tiledi. «Bıyl Qazaqstannyń baıtaǵy, jahandyq megapolıs Astananyń 20 jyldyǵy. Sondaı-aq musylman álemindegi tuńǵysh zaıyrly memleket Ázerbaıjan Demokratııalyq memleketiniń qurylýy, aqıyq aqyn Maǵjan Jumabaıulynyń 125, zańǵar jazýshy Shyńǵys Aıtmatovtyń 90 jyldyǵy syndy mereıli datalar qamtylǵan uly dala forýmyna qatysýshy ǵalymdar sany 250 adamǵa jýyqtaǵany kóńil qýantady. «Uly dala» III gýmanıtarlyq ǵylymdar forýmy búkil Túrki áleminiń basyn biriktiretin, aıasy keń, maǵynasy tereń kıeli uǵym. Elbasy Nursultan Ábishuly Qazaq handyǵynyń 550 jyldyǵyna arnalǵan saltanatty jıynynda «Bizdiń qasıetti jerimizdi Uly Dala dep, al babalarymyzdy Uly dalanyń urpaqtary dep ataǵan. Biz solardyń jalǵasymyz, biz Uly Dalanyń muragerimiz» dep beker aıtqan joq. Osy oraıda atalǵan hlyqaralyq forýmda adamzat damýyndaǵy Túrki áleminiń orny men mádenı qundylyqtary talqylanyp, jahandyq jáne aımaqtyq mańyzy bar ózekti máseleler jóninde usynystar jasalatyn ıntellektýaldy suhbat alańy mártebesine ıe bolyp otyr. Sonymen qatar forýym álemge tanymal ǵalymdar arasyndaǵy baılanysty nyǵaıta túsedi dep senemin. Qazaqstan Prezıdenti Nursultan Nazarbaevtyń jahandyq saıasattaǵy tegeýrindi tulǵasyn, Túrki álemindegi jetekshilik rólin, rýhanı jańǵyrý jobasyndaǵy ıdeıalaryn keńinen nasıhattaý forýmnyń negizgi mindetti bolyp sanalady», dedi Gúlshara Ábdiqalyqova.
Ázerbaıjan, Qazaqstan, Qyrǵyzstan,Túrkııa, Túrkimenstan, О́zbekstan, Tájikstan, Mońǵolııa, AQSh, Venesýela, Reseı, Bashqurtstan (RF), Tatarstan (RF), Chývashııa (RF), Saha (RF), Altaı (RF), Germanııa, Qytaı, Majarstan, Polsha, Moldova memleketterinen kelgen 200-ge jýyq ǵalym-zertteýshi men sarapshylar paneldi otyrysta mazmundy baıandamalar jasap, forým aıasynda Halyqaralyq Túrki akademııasynyń sońǵy jyldary jaryqqa shyǵarǵan kitaptarynyń kórmesi uıymdastyryldy.
Aıa О́MIRTAI,
«Egemen Qazaqstan»
