Aǵaıyn arasyna altyn arqaý bolǵan bul ıgi is «Qazaq radıolary» JShS men Túrkııa memlekettik teleradıo korporasııasynyń (TRT) «Túrkııa radıolary» basqarmasy arasyndaǵy ekijaqty kelissózder nátıjesinde júzege asyp otyr. Atap aıtqanda, bıylǵy mamyr aıynda Seriktestik basshysy Mádı Manatbekuly bastaǵan radıo delegasııasy arnaıy shaqyrtýmen Túrkııada bolyp, baýyrlas eki eldiń áriptes qurylymdary arasynda mádenıet, rýhanııatqa arnalatyn habar almasý týraly ýaǵdalasqan edi.
«Qazaq radıosy» tarıhı otanynan tys júrgen aǵaıynǵa halqymyzdyń baı mádenı murasy jaıly mol maǵlumat berip, rýhanı asyl qazynamyzdy nasıhattaýdy maqsat etken «Túrkistannan tartý» baǵdarlamasyn usyndy. Radıohabar týǵan jerdi ańsap, tól ónerimizge shólirkep júrgen qıyrdaǵy qandastardyń saǵynyshyn basýdy kózdeıdi.
Al «Túrkııa úni» radıosy daıyndaıtyn «Anadoly tynysy» habary qazaq tyńdarmanyn Túrkııadaǵy mádenı Hám sporttyq jańalyqtardan qulaǵdar etedi. Budan bólek, atalǵan baǵdarlama qazaqstandyq tyńdaýshyny Túrkııada turatyn qazaqtardyń ómir saltymen jáne eki el arasyndaǵy dostyq qarym-qatynas aıasyndaǵy is-sharalarmen tanystyrady.
Bul baǵdarlamalar arqyly túbi bir halyqtardyń rýhanı, mədenı, tildik jáne tarıhı tamyrlastyǵyn aqparattyq keńistikte de nyǵaıta túsý kózdelgen.
Aıta keterligi, alǵash 2018 jyldyń 3 maýsymynda áýe tolqynǵa shyqqan radıobaǵdarlamalardy apta aralatyp, jeksenbi kúni tyńdaýǵa bolady. «Túrkistannan tartý» habary Astana ýaqytymen 19:40-ta «Túrkııa úni» radıosynyń efırinen beriledi. Al «Anadoly tynysy» baǵdarlamasyn «Qazaq radıosynyń» tyńdarmandary saǵat 15:00-de tyńdaı alady.
