Áıelder arasynda tanymal bolǵan týyndylar

1. Tizimniń kósh basynda ta­ny­mal psıho­log Mıhaıl Lab­­kovskııdiń «Hochý ı býdý» atty kitaby tur. Avtor kez kel­gen adam bala­synyń baqytty bolýǵa ári qalaǵan isimen aınalysýǵa quqyly ekenine kámil senedi. Atalǵan eńbekte ózińdi túsiný, qýana bilý, aınaladaǵylarmen jarasymdy ómir súrý jaıy aıtylady. Sonymen birge biz­ge málim de beımálim ýaıym men únemi úreılený, adamı qarym-qatynastyń negizgi sebep­terin izdeıdi. Avtordyń oıynsha, izdenis pen ynta arqy­ly adamnyń ózin, maqsaty bul­dyr ómirin túbegeıli ózger­týge bolady. Adamnyń óz ómir jolyn, maqsattaryn, qundy­lyqtaryn, ádep normalaryn, bolashaq mamandyǵy men tur­mystyq ómir jaǵdaılaryn durys qalyptastyrýdaǵy tulǵa­lyq damýdyń naqty qyrlaryn kór­setip beredi. 35 jyl­dyq tájirıbesi bar Mıhaıl Labkov­skıı Ierýsalımde tártibi qıyn balalarmen jumys istegen. 

2. Pop-psı­hologııa baǵy­tynda jazylǵan kóptegen best­sellerdiń avtory – Lýıza Heı­­diń «21 kún­de baqytty bo­lý­dyń to­lyq kýrsy» at­ty eńbegi qazaqstandyq qyz-kelin­shekter nazarynan qalaı tys qalsyn?! «О́mir súrý óte qarapaıym dúnıe», dep sanaıtyn avtor baqytty sátterdi baǵalaı bilýge úndeıdi. Avtordyń daıyn­dyq kitabyndaǵy tapsyr­malardyń deni aına aldyndaǵy jattyǵýlardan turady. 21 kún ishinde ishki qajyr-qaıratty nyqtaý, shyǵarmashylyq áleýetti arttyrý, ózin-ózi baǵalaı bilý, jaqsy kórý men raqymdy bolý, ótken shaqtaǵy eski renishterdi umytyp, alǵa bet alýdy úırenesiz. Atalǵan eńbektiń negizgi konsepsııasy onyń 1976 jyly shyq­qan «Tánińdi saýyqtyr» atty kitabynan alynǵan. Bul kitap búginde 33 elge taralyp, álem­niń 25 tiline aýdarylǵan. Dál osy Lýıza qurǵan ádisteme mıllıon­daǵan oqyrmannyń úmit otyn qaıta jaqty. 

3. Zamanaýı qoǵam tabysty bolý kýltin nasıhattaıdy. Ekiniń birine aqyldy bol, baı bol, tabysty, qysqasy bári­nen artyq bol degen uranǵa úndeıtini ras. Al tabysty bolý men jaqsy ómirge táýeldilik oryn­dalmaǵan armandar men jetistikterdi únemi eske salyp turady. Shynymen qalaı baqytty ómir súrýge bolady? Tany­mal bloger Mark Menson «Pofıgızm óneri. Baqytty bolý­dyń paradoks tásilderi» atty kitabynda bul suraqtyń sony jaýabyn kórsetip beredi. Ázil-shyny aralas jazylǵan eńbek qarapaıymdylyq pen shy­naıylyqqa, ár adamnyń tul­ǵalyq ereksheligine mán berýge qurylǵan. О́mirde baqytty bolǵyńyz kelse, bar bolǵany qoldy bir silteýdi úırenseńiz bol­ǵany, deıdi avtor.

Aıa О́MIRTAI,
«Egemen Qazaqstan»