Otandyq jáne halyqaralyq IT-mamandar qatysqan shara barysynda startaptardyń damýy boıynsha jańa baǵdarlamalar legi iske qosyldy. Atap aıtqanda, tehnoparktiń ekinshi akselerattaý baǵdarlamalary bastaý aldy, jas IT-jobalardy keshendik damytýmen aınalysatyn «100 startap» jańa jobasy iske qosyldy.
Tehnoparktiń múmkindikteri jurt nazaryna usynylǵan sharaǵa Premer-Mınıstrdiń orynbasary Asqar Jumaǵalıev, Aqparat jáne kommýnıkasııalar mınıstri Dáýren Abaev qatysqanyn aıta keteıik. Asqar Jumaǵalıev jastarǵa arnaǵan quttyqtaý sózinde olardyń qolynan shyqqan IT-jobalarǵa erekshe mańyz berý kerektigin, elimizde osy tektes ınnovasııalyq jobalardy damytýǵa jan-jaqty múmkindik jasalyp jatqanyn atap ótti.
– Jańa ǵana balalar ózderi oılap tapqan, óz qoldarymen jasaǵan jumystaryn kórsetti. Prezıdenttiń ınnovasııalyq ekojúıe qurý týraly ıdeıasy, armany ómirsheń ekenin, onyń shyndyqqa aınala bastaǵanyn bildiredi. Árıne, bizge áli birqatar zańnamalarǵa ózgeris engizý kerek. Qazaqstannyń jáne sheteldik bilikti IT-mamandarynyń basyn biriktirý qajet. Men bul jerde úlken dúnıe jasalyp jatqanyn aıqyn sezinip turmyn. Jalyndap turǵan jastar kóp eken, – dedi A.Jumaǵalıev.
Sondaı-aq A.Jumaǵalıev «Sıfrly Qazaqstan» baǵdarlamasynyń ınnovasııalyq tehnologııalardy damytýǵa yqpal etip, múmkindikterdi molaıtatynyna da toqtaldy.
– Memleket basshysy «Sıfrly Qazaqstan» baǵdarlamasyn maquldady, atalǵan baǵdarlama negizgi bes baǵyttan turady: adamı kapıtal, sıfrly memleket qurý, sıfrly ekonomıka, telekommýnıkasııalyq ınfraqurylym qalyptastyrý jáne eń bastysy – ınnovasııalyq ekojúıe qurý. Bul jańa ıdeıalar dúnıege keletin jáne aqıqatqa aınalatyn sala. Ony iske asyrý úshin aldymen tıisti zańnamalarǵa túzetý engizý kerek. Qazirgi tańda Úkimet venchýrlik qarjylandyrý boıynsha belsendi jumys isteýde. Salyqtyq jeńildikter turǵysynan alǵanda, biz búginde venchýrlik qarjylandyrý máseleleri boıynsha barlyq qyzmettermen tize qosyp áreket etýdemiz, – dedi A.Jumaǵalıev.
Úkimet basshysynyń orynbasary atap ótkendeı, salyq jeńildikteri IT saladaǵy mamandarǵa, startap jobalardyń ıelerine tıimdi bolýy úshin barlyq múmkindikterdi qolǵa alyp otyr. Mamandardy mektepterde, ınstıtýttarda ázirleý isine de kóńil bólinedi. A.Jumaǵalıev alǵash bastaýysh synyptarda baǵdarlamalaý, robot tehnıkasy úıretiletini týraly aıtylǵan kezde ony túsinbeýshilikter bolǵanyn, qazir barlyǵy túsinistik tapqanyn tilge tıek etti.
Aqparat jáne kommýnıkasııalar mınıstri Dáýren Abaev ta IT-startaptar tehnoparkiniń jumysyn joǵary baǵalady.
– Biz tarıhı oqıǵanyń, aıryqsha ulttyq ınnovasııalyq ekojúıeniń qalyptasýyna kýá bolyp otyrmyz. Men búgingi kishkentaı qadamnyń bolashaq úlken serpinge negiz bolatynyna senimdimin. Keleshekte Astana Hub álemdegi ozyq tehnologııalar men daryndy mamandar shoǵyrlanǵan úlken ortalyqqa aınalady. Jobany iske qosý arqyly biz Memleket basshysynyń Qazaqstandy sıfrly-ınnovasııalyq sheshimder ortalyǵyna aınaldyrý jónindegi basty ıdeıalaryn júzege asyratyn bolamyz. Qazirgi zamanda bul adamı kapıtalǵa ınvestısııa salý arqyly ǵana oryndalatyny belgili» dep atap ótti D.Abaev myrza.
Aqparat jáne kommýnıkasııalar mınıstri óz sózinde elimizdegi startaptar men IT-jobalardy qarjylandyrýǵa atsalysyp jatqan ınvestorlarǵa alǵysyn bildirdi.
Osy is-shara aıasynda bıik belesterdi baǵyndyrǵan startaptardyń negizin qalaýshylar, halyqaralyq sarapshylar startaptardyń qalyptasý joly men ınnovasııalyq ekojúıeni damytý boıynsha oılaryn ortaǵa saldy.
Arnur ASQAR,
«Egemen Qazaqstan»
