Mundaıda durysy qazaǵymyzdyń dástúrli sýsyny qymyz, qymyranǵa eshteńe jetpeıdi. Shólińdi tez qandyratyn tary, bıdaı, júgeri kóje bar. Gazdalǵan sýsyndardyń zııanyn bilip qalǵan jurt búginde osy sýsyndarǵa oıysýda.
Qymyz, qymyran sýpermarketterde satylymǵa túsip jatyr. Biraq, ashyǵan kóje joqtyń qasy. Isker adamdar onyń da oıabyn tabady eken. Jańaqorǵan aýdany, Keıden aýylynyń turǵyny Qasym Ábjapparov júgeriden sýsyn daıyndap, dúken jelisine shyǵaryp otyr. Aty – «Káýsar».
Qasekeń áýelde júgerini túıip, saýda ortalyqtaryna ótkizip júredi. Qalaǵa bir barǵanynda júgeriden popkorn jasaıtyn qondyrǵyny kórip, sony jasamaqqa qyzyǵady. Áýelde júgerini satyp, artynan popkornǵa ótken azamat bıznesin jandandyrýdyń basqa da amaldaryn izdeı bastaıdy. Gazdalǵan sýsyndardan eldiń beti qaıtqan kezi. Shilińgir shildede shólirkegen jurt ashymalǵa qumar. Osynyń bárin oı eleginen ótkizgen jigit aǵasy júgeriden sýsyn daıyndap kóredi. Kóshe-kósheniń boıynda satylatyn kúndik sýsyn emes, dúkender jelisinde satýǵa qolaıly sýsyn.
Qazaqtyń Taǵamtaný ınstıtýty Ábjapparovtar otbasy daıyndaǵan sýsyn quramynda paıdaly dárýmenderdiń moldyǵyn aıtyp, jaqsy qorytyndy beredi.
Jańa joba qııalyn samǵatqan Qasym Ábjapparov «Bıznestiń jol kartasy-2020» baǵdarlamasyna qatysyp, grant jeńip alady. Bul – jańa bıznestik jobany qýattaıtyn, qaıtarylmaıtyn qarjy. Osy qarajatqa kerekti qondyrǵylardy, syrtqy qorabyn daıyndaıtyn apparat satyp alady.
Taza ónimnen daıyndalǵan, quramynda paıdaly dárýmenderi kóp «Káýsar» búginde saýda jelilerinde satylady. Aýylda otyryp-aq úlken naryqqa kirgen azamat bolashaqta qaýyn men qarbyz sýsyndaryn shyǵarmaqqa nıettenip otyr.
Baqtııar TAIJAN,
«Egemen Qazaqstan»
Qyzylorda oblysy
