Bul basqarmada magıstraldyq munaı qubyrlary júıesi boıynsha munaı aǵynyn basqarý ortalyqtandyrylǵan jáne sıfrlandyrylǵan.
Bas dıspetcherlik basqarmasy «QazTransOıl» AQ-ǵa munaıdy qabyldaýdy jáne tapsyrýdy, «Aqtaý» porty men kompanııanyń temirjol estakadalarynda munaı quıýdy onlaın rejımde qadaǵalaýǵa múmkindik beredi. Osy arqyly «QazTransOıl» aǵyndy dıspetcherlik baqylaý jáne basqarý SCADA júıesin engizý boıynsha jobany tolyq júzege asyrady. Basqarýdyń bul ádisi magıstraldy munaı qubyrlaryn alys qashyqtyqtan senimdi túrde basqarýǵa jáne baqylaýǵa múmkindik beretin úzdik álemdik tájirıbeler negizinde júzege asyrylyp otyr.
«QazTransOıl» kompanııasyndaǵy sıfrlyq tehnologııalar elimizdegi munaıdy munaı óndeý zaýyttaryna jetkizýdi, Qara jáne Baltyq teńizderiniń porttary arqyly Qytaıǵa jáne О́zbekstanǵa eksporttaýdy basqarýǵa, sondaı-aq reseılik munaıdy QHR men О́zbekstanǵa tranzıtteýge jańa múmkindikter beredi.
Buryn «QazTransOıl» AQ-daǵy dıspetcherlik basqarma qurylymy jergilikti dıspetcherlik pýnkter (JDP), aýdandyq dıspetcherlik pýnkter, ortalyq dıspetcherlik pýnkter jáne Astanadaǵy Bas dıspetcherlik basqarma (BDB) dep atalatyn tórt deńgeıli satydan turǵan. Alaıda jańa sıfrlyq tehnologııalar qazirgi ýaqytta basqarýdyń eki tásilin qysqartyp, qurylymdy tek JDP men BDB arqyly basqarýǵa múmkindik berdi.
Sonymen qatar, «Samuryq-Qazyna» Ulttyq ál-aýqat qory» AQ basqarma tóraǵasy Ahmetjan Esimov qaıta qalpyna keltirý jumystary júrgizilgen Aqtóbe oblysyndaǵy «Keńqııaq» bas munaı aıdaý stansasyn sıfrly tehnologııalar arqyly Bas dıspetcherlik basqarmadan iske qosty. «Bul - úlken shara. Osy jobanyń sátti júzege asýymen barlyǵyńyzdy quttyqtaımyn. Bul tek «QazTransOıl» úshin ǵana emes, elimiz úshin de óte mańyzdy ári keleshegi zor joba», dedi A. Esimov.
Al «QazTransOıl» AQ bas dırektory Dımash Dosanov bul munaı aıdaý stansııasy Qazaqstannyń Qytaıǵa munaı tasymalyn 20 mln tonnaǵa deıin arttyrýǵa múmkindik beretinin aıtyp ótti. «Keńqııaq» bas munaı aıdaý stansasynyń iske qosylýy qazaqstandyq munaıdy QHR-ǵa eksporttaý kólemin ulǵaıtýǵa, Batys Qazaqstan munaıyn otandyq MО́Z-derge tasymaldaýdy qamtamasyz etýge múmkindik beredi. Jaqyn arada Batys Qazaqstannyń ken oryndaryndaǵy munaı Pavlodar, Shymkent munaı óńdeý zaýyttaryna jáne QHR-ǵa eksportqa jóneltiletin bolady. Osylaısha Qazaqstannyń eksporttyq áleýeti ulǵaıtylmaq», dedi ol.
Dıspetcherlik ortalyqta bir aýysymda 9 dıspetcher táýlik boıy jumys isteıdi. Jalpy munaı aıdaý stansasynyń prosesine úzdiksiz monıtorıng jasaý úshin bul ortalyqta barlyǵy 47 adam qyzmet etedi. Menedjerler dıagrammalar kómegimen negizgi jáne qosalqy jabdyqtyń, munaı qubyrlarynyń parametrlerin baqylaıdy. Sonymen qatar, bul dıspetcherlik ortalyq munaı qubyrynyń mańynda atqarylyp jatqan barlyq jumystardy jáne qubyr boıyndaǵy aqaýlardyń barlyǵyn tekserip otyrýǵa múmkindik beredi.
Mádına JÁLELQYZY,
«Egemen Qazaqstan»
