Batys Qazaqstan oblysy sońǵy kezge deıin turǵyndardyń taza aýyz sýmen qamtylýy boıynsha eń tómen óńir sanalyp kelgen edi.
- Bul olqylyqty joıý úshin byltyrdan beri óńirde jalpy jobalyq quny 4 mlrd teńge bolatyn sý qubyrlarynyń qurylysy júrgizildi. Bıyldyń ózinde tek Qaztalov aýdanynyń ózinde 13 eldi mekenge taza aýyz sý qubyryn tartý josparlanyp otyr. «Aqbulaq» baǵdarlamasynyń basty maqsaty – halyqty sapaly aýyz sýmen qajetinshe qamtamasyz etý, - deıdi Bıbigúl Qonysbaeva.
«NovoselStroıServıs» jáne «BatysGazStoı» JShS merdligerlik etken sý tartý jumystary josparǵa saı júrgizilgen. Qaıyńdy aýylyndaǵy taza aýyz sý júıesin qaıta jabdyqtaý jumysyna respýblıkalyq bıýdjetten 196 mln. teńge qarajat jumsalsa, Aqpáter aýylyndaǵy nysandy qaıta jańǵyrtýǵa 247 mln. teńge bólingen. Eki aýyl da aýyz sýdy irgedegi Qaraózennen tazartyp alyp paıdalanyp otyr.
– Aqpáter aýylynda 210 shańyraq taza sý qubyryn úıine kirgizip aldy, - deıdi aýyl aqsaqaly, eńbek ardageri Kárim О́teǵulov. Qaıyńdy aýylynyń turǵyny Serikjan Súleımenov te aýyldastarynyń «Aqbulaq» baǵdarlamasynyń ıgiligin kórip jatqanyn aıtyp, memlekettik baǵdarlamany júzege asyrǵan azamattarǵa alǵys aıtyp otyr.
Qazbek QUTTYMURATULY,
«Egemen Qazaqstan»
Batys Qazaqstan
Sýretti túsirgen Qaırat JAQYP
