Qazaqstan Respýblıkasy Prezıdenti Arhıviniń dırektory, tehnıka ǵylymdarynyń doktory, professor Borıs Japarovtyń alǵy sózimen ashylǵan shara barysynda kópshilik nazaryna tarıhı-qujattyq kórme men derekti fılm usynyldy. Sol kórinister arqyly tarıhı sheshimniń qalaı qabyldanǵany, uly kóshtiń bastalýy, el astanasynyń alǵashqy kezeńdegi tynys-tirshiligi, Aqmolanyń Astanaǵa aınalýy jáne basqa da qundy derekterge qanyq boldyq.
– 1997 jyldyń 20 qazanynda Elbasy Nursultan Nazarbaev Aqmolany Qazaqstan Respýblıkasynyń astanasy dep jarııalady. Sol jyldyń 25 qazanynda elimizdiń memlekettik rámizderi Almatydan Aqmolaǵa kóshirildi. Al 1998 jyldyń 6 mamyrynda Prezıdenttiń Jarlyǵymen Aqmola qalasynyń ataýy Astana dep ózgertildi. Birte-birte úkimettik uıymdar men basqa da mekemeler Arqa tósine qonys aýdaryp, qurylys jumystary qarqyndy túrde júrgizile bastady. Nátıjesinde, qysqa ǵana merzim aralyǵynda záýlim ǵımarattar birinen keıin biri boı kóterip, jańa astanamyz keremet keıipke endi. Turǵyndar sany kúrt ósti. Orasan zor mańyzy bar saıası, ekonomıkalyq, áleýmettik-mádenı is sharalar men forýmdardyń jıi uıymdastyrylýynyń arqasynda álemdik qoǵamdastyq aldynda Astananyń bedeli men tanymaldyǵy artty. Bul kúnderi respýblıkamyzdyń bas qalasy adam tanymastaı bolyp ózgerdi. Oǵan barsha jurt kýá. 1999 jyly IýNESKO uıymy Astanaǵa «Álem qalasy» mártebesin berdi. Osynyń barlyǵy da Qazaqstan Respýblıkasynyń Prezıdenti – Ult kóshbasshysy Nursultan Nazarbaevtyń batyl ıdeıasy men kóregendigi jáne syndarly saıasatynyń arqasynda júzege asty, – deıdi Qazaqstan Respýblıkasy Prezıdenti Arhıviniń dırektory.
Almatyda uıymdastyrylǵan osy is-sharaǵa memleket jáne qoǵam qaıratkerleri, Arhıv janyndaǵy qoǵamdyq keńes músheleri jáne arhıv isiniń ardagerleri men qyzmetkerleri qatysty.
Ǵalym SÚLEIMEN,
«Egemen Qazaqstan»
ALMATY
