«Qazaq radıolary» JShS Astananyń 20 jyldyǵyna oraı 18-35 jas aralyǵyndaǵy aqyndardyń qatysýymen «Elbasy jáne elorda» atty radıomúsháıra uıymdastyrǵan bolatyn. Músháıranyń maqsaty – Astananyń álemdik qoǵamdastyq aldyndaǵy abyroı-bedelin jáne egemen elimiz úshin geosaıası mańyzy men alar ornyn, damý satylaryn óleńge arqaý ete otyryp, Elbasynyń eren eńbegin kórsetý. Sol arqyly eldi, jerdi, Otandy qurmetteýdiń úzdik úlgisin óskeleń urpaq sanasyna sińirý. Táýelsiz Qazaqstannyń keregesin kerip, ýyǵyn shanshyp, shańyraǵyn bıiktetken Elbasynyń eńbegi men jas qalanyń 20 jyldyq mereıtoıyn qalamgerler óleńge arqaý etti. Músháıraǵa 100 aqyn qatysyp, 300-ge jýyq óleń tústi. Osylaısha, egemen eldiń təýelsiz jastary elordanyń mereıtoıyna jyrdan shashý shashty.
Radıomúsháıranyń qazylar alqasynda aqyn, Qazaqstan Jazýshylar odaǵynyń múshesi, L.N.Gýmılev atyndaǵy Eýrazııalyq ulttyq ýnıversıteti qazaq ádebıeti kafedrasynyń dosenti, fılologııa ǵylymdarynyń kandıdaty Serikzat Dúısenǵazy, aqyn, fılologııa ǵylymdarynyń doktory Qazaqstan Jazýshylar odaǵynyń múshesi Janat Áskerbekqyzy, «Qazaq radıolary» seriktestigi bas dırektorynyń orynbasary Ázimhan Aýsatov, aqyn, Qazaqstan Jazýshylar odaǵynyń múshesi, «Shalqar» radıosynyń dırektory Qalqaman Sarın, aqyn, telejýrnalıst, Qazaqstan Jazýshylar odaǵy jáne Jýrnalıster odaǵynyń múshesi Názıra Berdaly boldy.
Komıssııa músheleri radıomúsháıraǵa qatysqan aqyndardyń óleńderin saraptap, óz baǵalaryn berdi. «Komıssııa músheleriniń pikirin qoldaımyn. Barlyq aqynnyń óleńin muqııat oqyp shyqtym. Keıbirine tańdaı qaqsam, endi birinen uıqas kórmeı, ıdeıa tappaı qınaldym. Nurbek Keńesbaıulynyń «Tarıh hám eltutqa» atty óleńi unady. Bul aqyn jyraýǵa bergisiz eken. Tili óte shuraıly. Astanany ǵalamnyń segizinshi keremetine teńegen Muqaǵalı Seıtqazynyń óleńi de jaqsy. Bizdiń maqsatymyz – kóptiń ishinen bir myqtyny anyqtaý. Arman Sherızat degen aqynnyń «Bozoqta boz jýsannyń ıisi bar» atty óleńi kózge erekshe tústi. Bul aqyn óleńniń tehnıkasyn meńgergen, uıqasy tııanaqty, sózdik qory baı, eń bastysy, qazaq tarıhyn biledi. О́leńi I orynǵa laıyq dep oılaımyn», dedi «Qazaq radıolary» seriktestigi bas dırektorynyń orynbasary Ázimhan Aýsatov.
Komıssııa otyrysynyń qorytyndysy boıynsha I oryn Arman Sherızatqa (500 000 teńge), II oryn Marlen Ǵılymhan (300 000 teńge) men Muqııat Qoıshybaıulyna (300 000 teńge), III oryn Birjan Ahmer (200 000 teńge) men Ǵylymnur Kádirbaıulyna (200 000 teńge) buıyrdy.
Sonymen qatar, eń úzdik 5 aqynnyń óleńine Ulttyq arna beınesıýjet túsirip, efırden beredi.
Baǵashar TURSYNBAIULY,
«Egemen Qazaqstan»
