Ertemen Jaıyq ózeniniń jaǵasynda sporttyq balyq aýlaý boıynsha týrnır ótti, jeńimpazdar túrli nomınasııalar boıynsha júldeler men syılyqtar aldy. Shıpajaı jaǵalaýynda eki bekire zaýyty ózenge bekire balyqtarynyń 20 myń shabaǵyn jiberdi. Jas shabaqtardyń salmaǵy 3-ten 10 grammǵa deıin.
«Búginde 20 myń shabaqty jiberýimiz kezdeısoq emes. Bıyl Atyraý oblysynyń aýmaǵynda jumys isteıtin eki bekire zaýyty ózderiniń 20 jyldyq mereıtoıyn atap ótýde. Sondaı-aq, bul mańyzdy kún Qazaqstan Astanasynyń 20 jyldyǵyna tuspa-tus keldi. Bul jyl saıynǵy dástúr jas balyqtardyń shyǵarylýy aımaqtaǵy qundy balyqtar sanynyń artýyna áser etetinine senimdimiz », - deıdi Jaıyq-Atyraý bekire zaýytynyń dırektory Ǵılman Sarsemalıev.
Shara barysynda festıval qonaqtary úshin bekire balyqtardyń kórmesi uıymdastyryldy.
Oblystyq ákimdiktiń aldyndaǵy Sultan Beıbarys alańynda Atyraý óndirýshileriniń balyq ónimderiniń jármeńkesi bastaldy. Munda Atyraý qalasynyń turǵyndary men qonaqtar jańa pisken, qurǵaq jáne ystalǵan balyqty, sondaı-aq ár túrli jartylaı fabrıkattardy satyp aldy.
Sultan Beıbarys alańynda balyqtan dámdi taǵam daıyndaý, balyqty tez tazalaý, balyq aýlaý jáne kir tasyn kóterý men arqan tartýdan jarystar boldy. Osydan keıin merekeniń qatysýshylary men qonaqtaryn balyqshylar kúnimen Atyraý oblysy ákiminiń birinshi orynbasary Serik Shapkenov quttyqtady.
«Jyl saıyn bizdiń eki bekire zaýyty ózenge shamamen 7 mıllıonǵa jýyq jas shabaqtardy jiberedi. Bizdiń óndiristik kooperatıvter jylyna 12 tonnaǵa deıin balyq alady, olardyń 85-90 paıyzy eksporttalady. Bul Atyraý oblysyndaǵy balyq ónerkásibi jaqsy qarqynmen damyp kele jatqanynyń taǵy bir kórinisi », - dedi Serik Shapkenov.
Shara barysynda balyq ónerkásibiniń ardagerleri men osy sala qyzmetkerleri saltanatty túrde marapattaldy. Atyraý oblysynyń ákimi atynan eń basty tórt qyzmetker alǵys hat aldy. Oblystyń 15 turǵyny Aýyl sharýashylyǵy mınıstrligi men Orman jáne janýarlar dúnıesi aımaqtyq komıteti dıplomdarymen marapattaldy, sodan keıin turǵyndar nazaryna merekelik konserttik baǵdarlama usynyldy.
Aıta keteıik, balyqshylar kúni merekesi saǵat 19.00-de S.Beıbarys alańynda merekelik konsert pen otshashýmen aıaqtalady.
Baqytgúl BABASh,
«Egemen Qazaqstan»
ATYRAÝ
