Túngi marafonnyń jalpy qashyqtyǵy 5 shaqyrym. Qatysýshylar Muz saraıy janynan júgirýdi bastap, ortalyq kópir arqyly oblystyq ákimdikke deıingi joldy júgirip ótti.
«Atyraý qalasynda marafon jylyna bir ret ótkiziledi. Al túngi marafondy alǵash ret qalanyń turǵyndary men qonaqtarynyń qyzyǵýshylyǵyn arttyrý úshin uıymdastyrdyq. Bul jastardyń sportpen turaqty aınalysýyna úlken múmkindik beredi. Aldaǵy ýaqytta balalar arasynda jáne kúzgi marafon ótkizý josparda bar», - deıdi «Atyrau Marathone-2018» uıymdastyrý komıtetiniń vıse-prezıdenti Iýrıı Ponomarev.
Márege alǵash bolyp Bazarbaı Daýtalıev kelip, jeńimpaz medalin moınyna taqty.
Barlyq qatysýshylarǵa jarys aldynda neon bilezikter, al márege jetken soń estelik medaldar berildi. Sondaı-aq, marafonnyń júgirýshileri sporttyq kostıýmderin merekeniń jalpy atmosferasyn kórsetken jarqyn elementtermen, neon shamdarmen bezendirdi.
Alǵash kelgen úzdik 10 qatysýshyǵa uıymdastyrýshylar atynan arnaıy syılyqtar tabys etildi.
Endi atyraýlyqtar kúzgi marafonǵa daıyndalady.
