DÚLDÚL
Aıdaǵar edi – tegim.
Týyp em
Arǵymaqtardan qaıyrǵan.
Shurqyraı shyǵyp teńiz túbinen,
Aı astynda ǵana jaıylǵam.
Jutyna ketsem jelige baılap,
Kekilim súıgen kók aspan.
Qutyra ketsem bórimen oınap,
Jetkizbeı júıtkip bel asqam.
O, Qambar atam, Qulager babam,
Qaıdasyń aǵam – Kókmoınaq.
Qaqpaılap uryp, myna ker zaman,
Barady bizdi otqa aıdap.
Tóbemnen búgin kúshigen ulyp,
Qansyrap qalǵan qulyn em.
Tóbel juldyzyń túsime kirip,
Kisinep shyǵam túnimen.
Tabaıyn qaıdan sensiz baǵymdy,
Qaldyrdyń ba endi jurtqa ıen,
Qyryq úsh kúndik kemshin babymdy,
Qymyzben jazǵan Qurtqa-ıem!
Siri tabanyń joldardy qajap,
“Senimen janym egiz” dep.
Sen tiri bolsań, Qoblandy-qazaq,
Kelersiń bir kún meni izdep!
Tabarsyń bir kún meni izdep...
***
Ińir qarańǵysynda keldi kóktem,
Sol baıaǵy sezimmen, sol júrekpen.
Qarlyǵashtyń baýyryn qas-qaǵymda,
Qaryndastyń kózindeı móldiretken.
Birde aǵytyp shiderin kóńil kerdiń,
Múlde jańa keledi ómirge engiń.
Eń alǵashqy tamshysy mólt ete qap,
Shymyrlatty quıqasyn qońyr jonnyń.
Qarashyǵyń sekildi taldyń búri,
Janashyryń sekildi ár bulbuly.
Qolyń sozsań erkelep,
Emirenip,
Juparlanyp qoıady balǵyn gúli.
Qozy enesin izdeıdi, sóz egesin,
Sonaý balǵyn kúnderdi kezedi esiń.
Bala murty tebindep bozbala – tal,
Kórshi qyzdyń qaǵyp tur terezesin...
***
Kórshi jaıyn aıta kep, kóńil jaıyn,
Anam keıde keltirip sóz yńǵaıyn.
“Áp-ádemi bala ǵoı, aınalaıyn”
Uly úılenbeı qalardaı – so(l) bir ýaıym.
Sol kórshi qyz júrse de aǵa tutpaı,
Unatpaǵan kúıge enip,
Sál asyqpaı.
“Qaryndas qoı ol maǵan,
Qaryndasty
Qorǵaý kerek, – deımin men, – qarashyqtaı”
Mensinbesin bilem ǵoı, qurdas qurly,
Bóldi deısiń, áıtpese, bul jas kimdi?!
“Ákesi de jaqsy adam” ákeme dos,
Al, anasy anama syrlas qurby.
Anasy bir jaqsy adam, joq nalasy,
Atymdy aıtsa alǵandaı shoqqa basyp:
“Kishkentaımyn men odan” deıdi eken qyz,
“Men de ákeńnen kishimin” depti anasy.
Nege ekenin sol sózin anasynyń,
Jaqsy kórem janymdaı áli osy kún.
Bildirmesten júrip-aq týǵan aıdaı,
Bir-aq kúnde boıjetti “qarashyǵym”.
Analardyń tilegi-aı, áppaq tegi,
Bizder úshin qoıdy eken saqtap neni.
Anda-sanda kezdessek qymsynamyz,
Sol uıańdyq – tátti edi,
táp-tátti edi…
Týǵan aýyl – kindigim júz baılanyp,
Jettim búgin, jaz aýyp, kúzge aınalyp.
“Toı bop jatyr kórshi úıde” deıdi anashym...
Júrek neni qımaıdy,
Syzdaı qalyp?!
***
Táńir kýá!
Beıǵam, tynysh túnimdi
Seni oılaýmen azaıttym.
Meni súıetinińdi
Jastyǵyńa sińip qalǵan jas aıtty.
О́mir kýá!
Shashymdaǵy aǵymdy
Seni oılaýmen molaıttym.
Meni saǵynǵanyńdy
Qarashyǵyń sińip qalǵan jol aıtty!
***
Uıaty qalmaı, ómirde endi jasarǵa,
Mahabbat óldi –
Kúnásiz edi keshe ol da,
Tániniń ǵana toıatyn izdep jalǵannan,
Urynǵan shyǵar ne jarǵa,
Múmkin,
Ne sorǵa.
Mahabbat óldi!
Basyna keldi dos, baýyr,
Aqıqat-ólim –
Sanaǵa salmaq,
Eske aýyr.
Jerledik tánin, rýhyn kókke jiberdik,
Kúnási kóp ed,
Tozaqqa salmaı kesh, Táńir!
О́ltirmedi eshkim,
qaqpanyn quryp, qas qylyp,
Mahabbat óldi!
Meńdegen nápsi asqynyp,
Mahabbat óldi!
Bul da bir túsken japyraq,
Solq ete qaldy jas shybyq.
Mahabbat – japyraq,
Júrek pe, júrek – talshybyq.
Jylaıdy keıde, jańbyrǵa, jasqa malshynyp.
Qanshama kóktem oraldy qaıta,
jetti kúz.
Qanshama japyraq qýrady, soldy,
Qan sýyp.
Jylama endi!
Júregińdi aman saqtaǵyn,
Keledi qustar, shýlatyp JAPYRAQTARYN,
Keledi kóktem!
Oranyp al da aq qarǵa,
Uıyqtaı ǵoı qazir,
O, meniń topyraq – tánim.
***
Bul ǵumyrda syr aıtamyn dep júrip,
Taǵdyrymdy talaı jarǵa qulattym.
Sulý qyzdy qýantamyn dep júrip,
Jaqsy qyzdy jalǵyzdyqtan jylattym.
Jyr-ǵumyrda azbaımyn dep júrip-aq,
Kóp dosymnan alasardym, ketildim.
Jaman óleń jazbaımyn dep júrip-aq,
Jaqsy sózdi jalǵyzdyqtan óltirdim.
