«Rýhanı jańǵyrý» baǵdarlamasy aıasynda Ispanııa mádenıet Mınıstrligimen strategııalyq seriktestik ornatylyp, «Servantes Instıtýty» joba keńesshisi retinde bekitildi. Qazirgi zamanǵy qazaq ádebıetiniń ıspan tilindegi eki antologııasyn aýdarý, basyp shyǵarý, taratý jumystary úshin «Visor-Libros» baspa úıi tańdaldy.
Atalǵan memorandým ıspan astanasyndaǵy Qazaqstan elshiliginde jasaldy. Qujatqa «Rýhanı jańǵyrý» baǵdarlamasyn iske asyrý jónindegi Ulttyq komıssııanyń hatshysy Aıda Balaeva men baspa úıiniń Prezıdenti Hesýs Garsıa Sanches qol qoıdy. Is-sharaǵa Qazaqstannyń Ispanııadaǵy elshisi Konstantın Jıgalov pen «Ulttyq aýdarma bıýrosynyń» dırektory Raýan Kenjehanuly qatysty.
«Visor-Libros» baspasy – shetel ádebıetimen aınalysatyn mamandandyrylǵan biregeı baspa. Baspa úıi kóp jyldyq tájirıbege ıe. Álemniń ondaǵan elimen jumys jasap, aqyn-jazýshylar shyǵarmashylyǵyn nasıhattaýda ónimdi eńbek etip keledi.
«Visor-Libros» baspasy Ispanııada ǵana suranysqa ıe bolyp qoımaı, Latyn Amerıka elderi men Soltústik Amerıkadaǵy ıspan tildi memleketterde de keńinen tanymal.
Qazaqstan men eki el arasyndaǵy kelisimge sáıkes, qazaq ádebıeti antologııasyn tek Ispanııada ǵana emes, ózge elderde de taratý-nasıhattaý jumystary kózdelgen. Kópshilik biletindeı, ıspan tili tek ıspan eliniń ǵana emes, sonymen qatar Latyn Amerıkasynyń 18 eli úshin de ana tili sanalady. Bul tilde álemde 600 mıllıonnan astam adam sóıleıdi.
