Elbasynyń «Bolashaqqa baǵdar: rýhanı jańǵyrý» atty baǵdarlamalyq maqalasynda aıtylǵan mindetterdi júzege asyrý aıasynda ótken jyly óńirde M.H.Dýlatı atyndaǵy Taraz memlekettik ýnıversıtetiniń rektory Mahmetǵalı Sarybekovtiń bastamasymen «Áýlıeata óńiriniń kıeli geografııasy» atty ǵylymı-zertteý jumystary bastalǵan bolatyn.
Atalǵan bastamaǵa baılanysty jýyrda oqý ordasynyń bas ǵımaratynyń aldynan «Áýlıeata – kıeli meken-II» atty ǵylymı ekspedısııa óńir aýdandaryna jol tartty.
Ekspedısııa Taraz qalasynda jáne ózge aýdandarda tórt baǵyt boıynsha zerdeleý, zertteý jumystaryn júrgizýdi josparlap otyr. Birinshi baǵyt Taraz qalasyndaǵy Qarahan kesenesi, Qalı Júnis monshasy, Tórtkúl kerýen saraıy, Qarasaı shatqaly jáne Tekturmas kesenesi bolsa, ekinshi baǵytynda Jambyl aýdany, Aısha bıbi aýylyndaǵy Aısha bıbi, Babadja hatýn kesenesi, Jýaly aýdanynyń Berikqara shatqaly men ǵun-sarmat qorǵany, Talas jáne Sarysý aýdandarynyń kıeli jerleri qamtylǵan. Al úshinshi baǵyty Jetitóbe qorǵany, Qulan kenti, Merki qalashyǵy, Aspara bekinisi, Sypataı batyr kesenesi, Merki, T.Rysqulov jáne Qordaı aýdandaryndaǵy mádenı keshender bolsa, tórtinshi baǵyty Shý aýdanyndaǵy Jaısań ǵıbadathanasy, Balasaǵun qalashyǵy, Hıam bekinisi, Jańajol qonysy jáne Moıynqum aýdanynyń Suńqartaý men Hantaý kıeli mekenderi bolyp sanalady.
L.N.Gýmılev atyndaǵy Eýrazııa ulttyq ýnıversıtetiniń professory, tarıh ǵylymdarynyń doktory Aıman Dosymbaeva ótken jylǵy ekspedısııa barysynda Taraz qalasy men birqatar aýdandardan eski meshit, kóne monshalardyń tabylǵanyn, Qarataý jotalary men Jýaly aýdanynyń Berikqara shatqaly tarıhı qundylyqqa toly ekenin aıta kelip, bıylǵy jyly da bul jumystyń sátti jalǵasatynyna senim bildirdi.
Hamıt ESAMAN,
«Egemen Qazaqstan»
Jambyl oblysy
