– Mýzeıde KSRO kezinde ıadrolyq jarylystar bolǵan, synaqtar júrgen «Degeleń», «Balapan», «Opytnoe pole» sııaqty alańdardan kórinister tolyq qamtylǵan, – dedi Kýrchatov qalasynyń ákimi Almas Ońdaqanov, – mýzeı qorynda 100-den astam túrli estelikter, eksponattar, kartalar, foto jáne beınematerıaldar bar. Synaq alańdarynan tikeleı ákelingen derekti zattardyń barlyǵy da osynda.
«Ulttyq qasiretten – ulttyq maqtanyshqa deıin» dep atalatyn ekspozısııa zalynda Prezıdent N.Nazarbaevtyń Jarlyǵymen qurylǵan Ulttyq ıadrolyq ortalyqtyń tarıhy keńinen qamtylypty. Tokamak KTM, KIR «Baıkal-1», pılotsyz basqarýdaǵy jabdyq, qazirgi tańdaǵy zamanaýı ólsheýish-eseptegish jáne kásiporynnyń marapattary men nagradalaryn da osy aradan kóre alasyz.
Semeıden arnaıy at arytyp jetken qonaqtar «Iаdrolyq tehnologııalar parki» AQ-daǵy «ELV-4» aýmaǵyna da bardy. «ELV-4» degenimiz bul túrli materıaldardy arnaıy jabdyqta radıasııalyq tekserýden, baǵamdaýdan ótkizý jáne mólsherin anyqtaý qurylǵysy. Qazirgi ýaqytta atalmysh elektrondy qondyrǵyda polımerlik buıymdardy tigý, medısınalyq zattardy zararsyzdandyrý, rezeńkelerdi qyzdyryp óńdeý jumystary júredi.
Kýrchatov qalasynyń ákimi Almas Ońdaqanovtyń aıtýynsha, kıeli jerlerdi aralaǵan kópshilik áıgili ǵalym I.V.Kýrchatovtyń eskertkishine baryp, ǵalym qyzmet etken jumys kabınetimen tanysyp qaıtty. Osynyń ózi tarıhtan úlken aqparat beredi, dedi ol. Al Semeı ıadrolyq synaq polıgony men Kýrchatov qalasynyń tarıhy týraly keremet fılmdi kelýshiler Mádenıet úıinen tamashalady.
Baǵdarlama sońynda eresektermen birge kelgen Semeı qalasynyń oqýshylary «Álem balalary atom bombasyna qarsy!» atty ınteraktıvti oıynǵa qatysty. Oıyn barysynda olar beıbit atom salasyn zertteýdegi dúnıe júzi ǵalymdarynyń jumystarymen tanysty. Tamyz aıynyń sońyna deıin Almaty qalasy jáne Shyǵys Qazaqstan oblysynyń barlyq aýdandarynan ártúrli jastaǵy balalar Semeı men Kýrchatov qalalaryna osy jobaǵa oraı arnaıy saparlap qaıtpaqshy.
Raýshan NUǴMANBEK,
jýrnalıst
Kýrchatov – Semeı
