«Álem áýenderi» eńbeginde túrli halyqtarǵa arnalǵan qyzyqty jyrlary toptastyrylsa, «Qyrǵyzym, bir týǵanym...» atty jınaǵynda baýyrlas qyrǵyz eline arnaǵan óleń, jyrlary, qyrǵyz aqyndarymen aıtystary, «Manas» eposynyń ózinshe jyrlaǵan eki taraýy, suhbattary engizilgen. «Meıirimdi Asqar» dep atalǵan qazaq, aǵylshyn, orys, nemis tilderinde, balalar men jasóspirimderge arnap jazylǵan ertegisinde, qazaq balasy álem halyqtary ertegileriniń barlyq keıipkerlerimen dos bolatyndyǵyn sýrettegen. Al «Skaz stoletnego stepnıaka» atty roman-ańyzynda avtor orys-german soǵysy jáne halyqtar dostyǵy týraly baıandaǵan.
Jıyn barysynda jáne kitaphanaǵa tartý etken eńbekteri jaıynda oılaryn ortaǵa salyp, syıǵa tartqan shyǵarmalaryna sholý jasaǵan Baıanǵalı Álimjanov: «Bul eńbekterim uzaq jyldan beri kóz maıymdy taýysqan jumysymnyń jemisi. Júzge kelgen qarttyń ómirin oryssha jazǵan sebebim, bizdiń tarıhymyz orystildi aýdıtorııaǵa durys jetpeıdi. О́zgerip, adam tanymastaı qubylady. Sol sebepti de «Abylaı han jáne onyń batyrlary» degen kitabymdy da oryssha jazǵan bolatynmyn. Qazaq tarıhy eshbir burmalaýsyz orystildi qaýymǵa jetse eken degen tilek. Kitaptarymdy ádeıi Tursynbek Kákishev atyndaǵy zalǵa tapsyryp otyrmyn. Ol kisi meniń ustazym bolǵan. Kitap oqyrman qaýymǵa qyzmet etedi dep senemin» dedi.
Sondaı-aq jıynda sóz alǵan aqyn Qorǵanbek Amanjol qalamdasyna arnaǵan óleńin oqyp, jyly lebizin bildirdi. «Baıanǵalı Álimjanovtyń bul istep júrgen jumystary úlken erlik. Qazaq ádebıetiniń ár janrynda qalam terbep júrgen oıy júırik Baıanǵalı orys tilinde de esh qınalmaı kórkem shyǵarma jazady. Bul kóp qalamgerde joq qasıet. Onyń on eki tomdyq qazaq tilinde jazǵan shyǵarmalary bar. Sonyń ózi qazaq ádebıeti úshin úlken olja», dedi ol.
Ulttyq akademııalyq kitaphana ujymy Baıanǵalı Álimjanovtyń shyǵarmashylyǵyna zor tabys tilep, alǵystaryn aıtty. Avtor shyǵarmalaryn izdegen oqyrman kitaptardy elektrondy kitaphanadan da taba alady.
Baǵashar TURSYNBAIULY,
«Egemen Qazaqstan»
