Meksıkanyń El Universal, La voz de Michoacan gazetteri, operalyq óner týraly qalam terbeıtin aýstralııalyq New Merker jýrnaly, perýlik Peruanos en suiza ınternet portaly sekildi oqyrmany mol jetekshi medıa ókilderi atalǵan sharadan aqparat taratty. Festıval týraly maqala jazǵan sheteldik avtorlardyń bári jıynnyń joǵary deńgeıde ótkenin atap ótti.
Máselen, El Universal gazetiniń tilshisi festıvaldiń Qazaqstandaǵy kıeli jerlerdiń biri sanalatyn Ulytaýda ótkenin aıta kele, «Bul meken ortalyq Qazaqstandaǵy jartylaı shóleıt aımaqta oryn tepken. Onda neolıt dáýiri adamdarynyń ómir súrgenin aıǵaqtaıtyn arheologııalyq derekter mol. Ulytaý qoryǵy men onyń tabıǵaty jáne landshafty IýNESKO-nyń Álemdik murasy tizimine engen. Qazirgi tańda Qazaqstan bıligi osy óńirde týrızmdi damytýdy qolǵa alyp otyr. Taýlarmen qorshalǵan atyrap talaı tarıhqa kýá bolyp, Qazaq eli mádenıetiniń negizgi túp qazyǵyna aınaldy», dep sýretteıdi.
Meksıkalyq jýrnalıst jıynnyń joǵary deńgeıde uıymdastyrylǵanyn aıta ketipti. Ásirese, avtordy festıval úshin jabdyqtalǵan etno aýyl tańǵaldyrǵan. «Sahnada qoıylǵan óner týyndylary birde-bir latynamerıkalyqty beıjaı qaldyrmaıtyny anyq. Shotland mýzykasy, orystardyń áni, qazaq dombyrasynyń qońyr úni, baraban, fleıta úni qosylyp erekshe bir áýez týyndaıdy. Jas mýzykanttar tilge, geografııalyq erekshelikke qaramastan mýzykanyń kez kelgen adamnyń júregin jaýlaıtynyn dáleldedi», dep túıindeıdi maqalasyn meksıkalyq tilshi.
New Merker jýrnaly ózderiniń ınternet portaldarynda oqıǵa ornynan arnaıy reportaj jasap otyrdy. Ásirese, aýstralııalyq opera ánshisi Anna Rıannyń óneri jan-jaqty kórsetildi. Sonymen qatar «Jezkıik» festıvaliniń tarıhı meken Ulytaýda ótkenine toqtalyp, uıymdastyrýshylardyń baryn salǵany anyq baıqalǵanyn jetkizgen.
«Jezqazǵan óńirinde ótken is-sharaǵa 17 elden kelgen ónerpazdar qatysty. Bul halyqaralyq yntymaqtastyqtyń jarqyn úlgisi sanalady. Festıvalǵa kelgender qonaqjaı halyqpen, bir-birimen jaqsy til tabysty. Álemniń ár túkpirinen jınalǵan ánshiler de ózara dostasyp ketti», delingen jýrnaldyń onlaın nusqasynda.
Jıynǵa kelgen japonııalyq bloger Tomkok Okado óziniń feısbýktegi paraqshasyna «Uıymdastyrýshylarǵa, ánshilerge, bıshilerge – jalpy is-sharaǵa atsalysqandardyń bárine alǵysym erekshe. Dostyq kóńil-kúı, meıirimdilik pen shabyt syılaǵandaryńyz úshin rahmet. Qazaqstandy teńdessiz festıval ótkizýimen quttyqtaımyn» dep jazdy.
Jalpy, I halyqaralyq «Jezkıik» mýzykalyq festıvali 13-14 shildede Ulytaýda ótti. Jıynǵa Japonııa, AQSh, Reseı, Perý, Shotlandııa sekildi birqatar memleketten klassıkalyq jáne ulttyq mýzyka ansamblderi qatysty. Is-sharany alty myńnan astam kórermen tamashalady.
Abaı ASANKELDIULY,
«Egemen Qazaqstan»
