Jıyrma segiz jyl buryn «Nevada-Semeı» qozǵalysynyń eki jyldyǵyna oraı jas sýretshi Káripbekpen Almatyǵa ilese kelgen ákesi Teltaı Kúıikov sol bir qasiretti jyldardyń jan tebirenterlik sátimen bólisken edi. Bir apta boıy ómirge kelgen balasyn kóre almaı, eki qolsyz sábıdi ıiskegende júrekteri qars aıyrylǵan áke men sheshe janary jylt etken, baýyr eti – balapandaryn qalaıda aman-esen ósirýge bel býǵan-dy.
Káripbek «Besiktegi qolsyz sábı», «Kúnniń tutylýy», «Iаdrolyq tuman», «Aral taǵdyry» sııaqty sýretterine qarap turyp, «men tańdaǵan taqyryp bul emes edi. Alaıda qaıǵy-qasiret jutqan dalanyń zaryn qalamyma arqaý etýge májbúr boldym» dep janaıqaıyn jetkizgen bolatyn.
Káripbek tórt jasynan bastap Reseıde emdeldi. Osylaısha ómiriniń on jeti jylyn kórshi elde ótkergen ol sýret salýǵa balalar úıinde beıimdeldi. Alty jasynan bastap qylqalamǵa qushtarlyǵy oıanǵan onyń sýretteri 13-14 jasqa kelgeninde ájeptáýir kóz súısinter dárejege jetti. Ol sýretterdi kóbine qalamyn tistep otyryp, jankeshtilikpen salatyn.
Birte-birte janaryna da salmaq túse bastady. Endi ol aıaǵynyń baqaılarymen sýret salýǵa mashyqtandy. Ýaqyt oǵan da tóselýge májbúrledi. Balalar úıinde sýret salý ǵana emes, aǵash joný, keste tigip, órnek toqý, shańǵy, konkı tebýdi meńgergen Káripbek oń-solyna úlken oı tastaı qaraıtyn bozbala shaqqa aýdy. Lenıngrad, Vologda, Orel, Máskeý sııaqty shaharlar Káripbektiń týǵan elge degen saǵynyshyn órshite tústi. Ańsary elge aýa berdi.
Mine, arada jyljyp jyldar ótipti. Káripbek – búginde qoǵamda óz ornyn tapqan belsendi azamat. Onyń sýretterin alys-jaqyn shetelder tanydy. Sol bir aýyr jyldardy basynan keshken áke men sheshe de balasynyń jetistigin kórip, kóńilderi bir jasap qaldy. Alaıda taǵdyrdyń taqsiretin júrekteriniń túbine búkken Káripbektiń qos qoldaýshysy bir jylda birinen keıin biri kóz jumdy. Káripbek qazir Qaraǵandyda turady. Qasynda demeý bolatyn eki ápkesi, inisi, jıenderi bar.
Kúni keshe Qaraǵandy qalasynyń ólketaný mýzeıinde sýretshiniń elý jasqa tolýyna oraı kórme uıymdastyryldy. Onda sýretshiniń alpysqa jýyq sýreti qoıyldy. Al Qaraǵandy oblysynyń ákimi Erlan Qoshanov mereıtoıyna oraı sýretshini qabyldap, páter kiltin tabys etti. Káripbek Kúıikovtiń «Iаdrolyq bolashaq úshin» syılyǵynyń laýreaty atanǵany jaıynda elimizdiń aqparat quraldary jarysa jazyp jatty. Ol ATOM jobasynyń qurmetti elshisi retinde álemdi ıadrolyq synaqtan azat etý qozǵalystarynyń belsendi múshesi sanalady.
Qaraǵandy oblysynyń Egindibulaq aýylynda ómirge kelgen sýretshi áke-sheshesiniń shańyraǵyna baryp, shyǵarmashylyǵyn týǵan jerde jalǵastyrýdy ańsaıdy. Peıili darqan, júregi keń azamat aýylyna qoldaý kórsetýdi de óziniń boryshy sanaıdy. Osy baǵytta jasap júrgen ıgi isteri kópshilikke úlgi dersiz.
Sýretshiniń shyǵarmashylyq toptamasynyń basym kópshiligi – tispen salynǵan sýretter. Alaıda Káripbek endigi sýretterin qyzyl ıegimen salýǵa májbúr. Júrekten jaryp shyqqan ǵajaıyp týyndylardy jasandy tispen salý áste múmkin emes. Al qyzyl ıek kemirgen qalamushtardy jıi aýystyrýǵa týra keledi. «Armandaǵan sýretterim áli de aq qaǵazben qaýyshqan joq. Egindibulaqqa baryp, topyraǵyn bir ıiskep, jasyl quraǵyn qapsyra qushqan sol bir sátte keremet dúnıelerim ómirge keler» degen úmitpen qaısar Káripbek aýyl jaqqa saǵynyshpen qaraılaıdy...
Elvıra Serikqyzy,
«Egemen Qazaqstan»
