2016 jyly atalǵan qoǵamdastyqtyń músheleri oblystaǵy ınternasıonaldyq otbasylarynyń balalaryn beıneleıtin kórme uıymdastyrý jóninde bastama kótergen bolatyn. Alǵashqy jobaǵa 10 jasqa deıingi 25 bala qatysty. Olardyń eń kishisi orys, mordva, ózbek ulttary ókilderimen naǵashyly-jıendi on aılyq Teone Sheremet bolǵan edi.
– Bul bastama aralas nekeni dáripteý emes, dostyqty nasıhattaý nıetinen týǵan. Aralas nekeden týǵan balalar sýretteriniń avtory, oblysqa belgili fotosýretshi Georgıı Shapovalov búldirshinderdiń rııasyz jymıysy men kózinen Qazaqstanda saltanat qurǵan dostyqty, birlikti, beıbit kúnimizdi kórsetýge tyrysqan, – deıdi «Birlik» etno-mádenı birlestigi jastar qanatynyń jetekshisi Zýlfııa Nabıeva. Fotosýretshi alǵashqy sýretterinde balalardyń qolyna jaýqazyn ustatyp qoıypty. Qazaq dalasyndaǵy kóktemniń nyshany bolyp esepteletin bul gúl adamdar arasyndaǵy meıirimniń, náziktiktiń de belgisi ispetti. Ol oblys emblemasynan da oryn alǵan. 2016 jyly 1 mamyr, ıaǵnı Qazaqstan halqy birligi kúni kórmeniń tusaýkeseri ótken bolatyn.
Bıyl «Biz – bir eldiń balalarymyz!» jobasy Astananyń 20 jyldyǵy merekesine arnaldy. Áleýmettik jeliler arqyly ótkizilgen baıqaýǵa oblystyń barlyq shalǵaıynan 76 bala qatysty. Solardyń arasynan áleýmettik jelilerde daýys berý arqyly 3 jeńimpaz: Lıana Hlynova, Adelına Jaqanova jáne Aılın Bolathannyń esimi anyqtaldy. Olarǵa jaz basynda ótken tatarlardyń «Sabantýı» merekesinde balanyń oıyn damytatyn oıynshyqtar tabys etildi. Sonymen qatar jeńimpazdar men beınesi jurttyń esinde qalatyn taǵy da 22 búldirshindi Georgıı Shapavalov fotosessııaǵa shaqyrdy.
– Sýretine qaraǵanda kimniń de bolsa júregi erip keterdeı súıkimdi, júziktiń kózinen ótkendeı ádemi osy 25 balanyń beınesi tatý-tátti, bir atanyń balasyndaı kelisim men birlikte, syılastyqta turyp jatqan júzden asa etnostyń Otanyna aınalǵan Qazaqstandaǵy beıbit ómirdi beıneleıdi, – deıdi Zúlfııa Nábıeva.
Sondyqtan janary zeńgir aspandaı, bulaq sýyndaı taza osy balalar Dostyq úıi qyzmetkerleri daıyndaǵan fotokórmelerdiń, kórkem fotoalbomdardyń keıipkerine aınaldy.
Názıra JÁRIMBETOVA,
«Egemen Qazaqstan»
QOSTANAI
