«Ár ólkeniń oıy oramdy, sózi salıqaly, kókiregi kúmbir, peıili súmbil qazyna qarttary bolady. Meniń uǵymymda Qurmanǵazy aýdanyndaǵy О́mirzaq Qajymǵalıev – osyndaı tulǵa. Kórgeni mol, túıgeni odan da tereń aǵanyń sergek sanasy, ne nársege de jedel ún qosqyshtyǵy kúni búgin de onyń baıypty da, sarabdal kelbetin odan ári órkeshtendire túsedi» dep jazady qalamdasy Isataı Balmaǵambetov. Uzaq jyldar boıy mal dárigeri qyzmetin atqaryp, aýdandyq atqarý komıtetiniń tóraǵasy, agro-ónerkásiptik keshenniń dırektory, asyl tuqymdy Edilbaı qoıyn ósiretin «Maqash» óndiristik kooperatıviniń basshysy qyzmetin atqara júrip, qolynan qalam túspegen О́mirzaq Qajymǵalıev «Bıikterge betalys», «Joldar, jyldar», «Narynnyń nar uldary», «Múslımat», «Darıǵa – dáýren», «Jankeshý», «Maqashpen qaýyshý», «Qııal…Úmit…», «Qyran qııada», «Samǵaý», «Jańǵyryq» kitaptaryn jazdy. О́z kásibimen qosa, qoǵamdyq jumystardan da syrt qalmaı, únemi rýhanııat sharýasyna bel sheshe kirisip ketetin qalamgerdiń jazýshylyq jolyn jankeshtilik dep atasa da bolady.
Soǵys kezindegi qazaqtyń ár aýylynda kezdesken zulmat keselin óz tilinde sýrettep jazyp, Ana beınesin jarqyrata kórsetken «Jankeshý» romany bir aýyldyń, ıa áýlettiń basynan keshken zobalańy emes, ult taǵdyryna jazylǵan qasiretti paraqtar edi. El ishindegi ártúrli pıǵyldy adamdardyń beınesin jasap, sonyń arasynda Ana kelbetin kelisti kestelegen qalamger zaman tynysyn jetkize alypty. «Ádebıetimizdegi Analar beınesi taǵy bir kúresker, qaıratker, meıirban, aqylman Anamen tolyqty dep aıtýǵa bolady» depti osy romanǵa jazǵan alǵy sózinde jazýshy Berik Shahanov.
«Darıǵa-dáýren» roman-essesinde Shalqar men Samaldyń arasyndaǵy ǵashyqtyq sezimdi sýrettegen, adal mahabbat, ińkár júrektiń boıamasyz, qazaqy qalybyn jasaǵan. Asyl mahabbatyń aıshyqty eskertkishindeı shyǵarmanyń alǵy sózin sheber jazýshy marqum Raqymjan Otarbaev jazypty.
Trılogııanyń túıini – «Kemel» romany arqyly qalamger ómir jolyn barynsha baıyptap, saraptap, eń kórnekti tustaryn aq qaǵazǵa túsiripti. О́mirde kórgen-baqqannyń bári altyn emes. Biraq bir qaraǵanda uzaq, bir oılanǵanda qysqa kóriner ǵumyrdyń maǵynaly, máıekti shaǵy da az bolmaıdy. Sony zerdelep, asyl sózben kesteleý de – jazýshylyq bolsa kerek. Erteńgi urpaqqa ónege ornyna jazylǵan «Kemel» romanyn aqyn Ǵalym Jaılybaı: «qazaqtyń kemeline kelgen, elim degen azamattary týraly ónege beretin úlken týyndy» dep baǵalapty.
Endeshe oqyrman qaýymǵa, qalamgerge qutty bolsyn deımiz.
Baǵashar TURSYNBAIULY,
«Egemen Qazaqstan»
