«Y.Altynsarınniń naǵashylary óte bilimge jaqyn bolaǵan kisiler. Sondaı kisi Shegen bıdiń shapany bar. Shegen bıdiń shapanyn osydan eki jyl buryn onyń týsyqandary bizdiń mýzeıge ákelip tapsyrdy», deıdi Qostanaı oblystyq Ybyraı Altynsarın memorıaldyq mýzeıiniń qyzmetkeri Shynar Sultanqyzy.
HIH ǵasyrdyń úlgisimen jasalǵan kúrsi, ustazdyń naǵashy atasy Shegen bıdiń shapany, naǵashysy Bektemis baıdyń tutynǵan aǵash kelsaby jáne taǵy basqa jádigerler jurt nazaryna usynylyp otyr.
«Qysqa ǵana 49 jyl ǵumyrynda Y.Altynsarın úlken aǵartýshylyqpen, pedagogıkamen aınalysyp, qazaq dalasynda qazaq jastary men qyzdaryn ǵylym men bilimge sýsyndaýǵa shaqyrǵan. Búgingi bizdiń is-sharanyń maqsaty da osyndaı ulylardy, pedagogtardy, qaıratkerlerdi búgingi urpaqtarǵa tanystyrý», deıdi Qoljazbalar men sırek kitaptar ulttyq ortalyǵy kórme zalynyń bas sarapshysy Ádiláli Jabyqbaıuly.
Kórme jumystarynyń ashylýyna kelgen zııaly qaýym ókilderi men qala turǵyndary uly pedagog, aǵartýshy jaıly oı-pikirlerin ortaǵa salyp, mundaı is-sharalardyń mańyzy zor ekenin aıtty.
«Osy Alataýdaı bolyp alystan kórinetin, qashanda júrekke jylý syılaıtyn, kóńilge qýanysh syılaıtyn osyndaı babalarymyz bar. Sonyń biri – Ybyraı babamyz. Sol babamyzdy bir aýnatý maqsatynda, sol kisiniń tálim-tárbıesin kóreıik, sol kisiniń artynda qalǵan mol murasyn bir buryshyn bolsa da tanysyp kóreıik degen jaqsy nıetpen jınalǵan ekensizder», deıdi aqyn Qonysbaı Ábil.
Astananyń 20 jyldyq mereıtoıyna oraı uıymdastyrylyp jatqan kórmeni qala turǵyndary men qonaqtary bir aı boıy tamashalaı alady. Al qostanaılyqtardyń Astanaǵa tartýy munymen aıaqtalmaq emes. Aldaǵy jeksenbi kúni «Etnoaýyl» ulttyq mádenı kesheninde «Qazynaly Qostanaıdan araıly Astanaǵa» atty konserttik baǵdarlama ótedi.
Marjan Serǵalıqyzy
Vıdeo: Janbolat Kenjeǵul
«Egemen Qazaqstan»
