Saltanatty sharaǵa Qazaqstan Respýblıkasynyń Memlekettik hatshysy Gúlshara Əbdiqalyqova, Qaraǵandy oblysynyń ákimi Erlan Qoshanov, Májilis depýtaty Qýanysh Sultanov, belgili memleket jəne qoǵam qaıratkerleri, elimizdiń ár aımaǵynan kelgen qalyń buqara qatysty.
Darhan dala tósindegi ulan-asyr toı shymyldyǵy S.Seıfýllın atyndaǵy Qaraǵandy oblystyq qazaq drama teatry ártisteriniń qatysýymen Buqar jyraýdyń ómiri týraly «Kúmis kómeı əýlıe» atty teatrlandyrylǵan qoıylymymen ashyldy. Memlekettik hatshy Gúlshara Əbdiqalyqova Qazaqstan Prezıdenti Nursultan Nazarbaevtyń quttyqtaýyn oqydy.
«Buqar jyraý – halyq taǵdyry tarazyǵa túsken qıyn-qystaý jyldarda ýájdi sózimen de, erlikti dáriptegen otty jyrlarymen de eldi uıytyp, halqymyzdy basshysynyń tóńiregine tyǵyz toptasýǵa, ata mekenimizdi jatjerlik basqynshylardan qorǵaýǵa únin qosa bilgen úlken qaıratker tulǵa.
Onyń ótkir de otty jyrlarynyń tórkininde qazaqtyń birtutas ult, qýatty el bolýyn ańsaǵan uly arman jatty. Jyraýdyń tarıhı tulǵasy, ómiri men shyǵarmalary búgingi urpaq úshin qanshalyqty qymbat ta qasterli bolsa, keleshekte de solaı bolyp qala beretini sózsiz.
Biz – uly babamyz arman etken birtutas ult, qýatty memleket bolýdy júzege asyrǵan baqytty urpaqpyz. Sondyqtan Buqar jyraý mura etken el taǵdyry, ult birligi máselesi halqymyz úshin árdaıym ózekti bolyp qala beredi. Búgingi úlken saltanat ta osyndaı ıgi maqsat oraıynda ótkizilip otyr. Uly babamyzdyń armany bolǵan búgingi táýelsiz elimiz máńgi jasaı bersin!», – degen Elbasy Buqar baba tulǵasynyń tarıhtaǵy ornyna laıyqty baǵasyn bergen.
Qaraǵandy oblysynyń ákimi Erlan Qoshanov atap ótkendeı, Buqar jyraý Qalqamanulynyń 350 jyldyǵy elimizdiń ortaq toıy. Jyraýǵa arnalǵan is-sharalar munymen shektelmeıdi. Kúzde aýqymdy ǵylymı-praktıkalyq konferensııa ótedi jəne birinshi kezekte jastardy Otanyn súıýge, patrıottyq sezimderin oıatýǵa baǵyttalǵan birqatar mereıtoılyq sharalar josparlanǵan.
Buqar jyraý elimizdiń tarıhynda óshpes mura qaldyrǵan áıgili aqyn hám óz zamanynyń dana da dara bıi, sheshendik ónerimen halyqty ózine qaratqan jyraý, Abylaı hannyń keńesshisi bolǵan kemeńger tulǵa.
Buqar jyraý Qalqamanulynyń mereıtoıy Qaraǵandy oblysynda jyl basynan beri túrli sharalarmen atalyp ótýde. О́ńirde uly oıshyldyń ómiri men shyǵarmashylyǵyna arnalǵan kórmeler, baıqaýlar, konsertter, jyrshy-jyraýlar festıvali, ǵylymı konferensııalar ótti.
Merekelik shara oblystyń shyǵarmashylyq ujymdarynyń qatysýymen uıymdastyrylǵan konserttik baǵdarlamaǵa ulasty. Sonymen qatar kópshilik osy toıǵa arnaıy kelgen Qazaqstannyń halyq ártisi Roza Rymbaevanyń, mádenıet salasynyń eńbek sińirgen qaıratkerleri Altynaı Jorabaevanyń, Jámıla Baspaqovanyń, Tájikstannyń H.Dadoboev atyndaǵy folklorlyq ansambldiń ónerlerine tánti boldy.
Tús aýa ulttyq oıyndar men sport túrlerinen uıymdastyrylǵan saıystarǵa kezek berildi: ár qıyrdan kelgen myqtylar qazaq kúresinen, kókpar men aýdaryspaqtan kúsh synasyp, júırikterin alaman báıge men top báıgege qosty.
Dala tósindegi aýqymdy shara Elbasy N.Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasyn júzege asyrý aıasynda uıymdastyryldy. Bul rýhanı qundylyqtardy, ulttyq salt-dástúrdi, qazaq eliniń tarıhyn Buqar jyraý syndy ulylarymyzdyń shyǵarmashylyǵy arqyly saqtap, damytatyny sózsiz.
Qaırat ÁBILDA,
«Egemen Qazaqstan»
Qaraǵandy oblysy,
Buqar jyraý aýdany
