Elimizge tanymal Shákızada Baıbatjanova, Qurman Shoıynbaev, Sáýle Jeldibaeva, Marat Áıtimov, Nurǵalı Turlybekov, Hadısha Seıitova, Jubanysh Jeksenuly, Gúljazıra Qaıyrbekova, Toqtar Serikov, Asqar Júnisbekov, «Jigitter» kvarteti, «Saryn» toby syndy kóptegen óner ıeleri 1992 jyldan beri dástúrge aınalǵan osy baıqaýdan qanat qaqqanyn aıta ketelik. Ár jylǵy baıqaýdyń ózindik ereksheligi, jańalyǵy bar. Mysaly, bıylǵy jetistigi uly kompozıtordyń oryndalmaı júrgen 15-ten asa áni jaryqqa shyǵarylyp, arnaıy aspaptardyń súıemeldeýimen tyńdarmanǵa jol tartty. Olardyń qatarynda «Kel, Býrabaıǵa», «Baıqońyr», «Kelin keldi», «Kókkóldegi keshter-aı», «Egiz maqta», «Ǵashyq kúnder» jáne Abaı Qunanbaevtyń sózine jazylǵan «Tyńda meni, dostarym» syndy ánder bar.
Bıyl 26-shy ret ótkizilgen baıqaý ónersúıer qaýymǵa jańa esimderdi áıgiledi. Aldymen Túrkistan oblysynyń mádenıet jáne tilderdi damytý basqarmasy, oblystyq mádenıet jáne halyq shyǵarmashylyǵy ortalyǵynyń uıymdastyrýymen ótken án baıqaýy «Shámshi álemi» gúlzaryndaǵy kompozıtor eskertkishine gúl shoqtaryn qoıý rásiminen bastaý alyp, Sh.Qaldaıaqov atyndaǵy oblystyq fılarmonııada jalǵasyn tapty. Maqsaty – Shámshi Qaldaıaqovtyń shyǵarmalaryn dáripteý, halyq arasynda án ónerin damytý, qazaq ánderin oryndaýshylar arasynan jas talant ıelerin anyqtap, kásibı baǵdar berý, jeke shyǵarmashyl tulǵalardyń qalyptasýyna yqpal etý, ánshilerdiń oryndaý sheberlikterin arttyra otyryp, olarǵa qoldaý kórsetý jáne otansúıgishtikke baýlý, ulttyq rýhta tárbıeleý bolatyn dástúrli óner dodasynyń aýdan, qalada ótken birinshi kezeńine 200-ge jýyq úmitker ótinish bildirgen. Onyń ishinen 21 úmitker fınalǵa kezeńge joldama aldy. О́ner báıgesine 15 - 29 jas aralyǵyndaǵy úmitkerler qatysty. Al úmitkerlerdiń talantyn shámshitanýshy, belgili kompozıtor Qaldybek Qurmanáli tóraǵalyq etken qazylar alqasy tarazylady.
Kópshilikke keremet áser syılaǵan, Shəmshi Qaldaıaqovtyń týǵan kúnine oraı uıymdastyrylǵan «Meniń Qazaqstanym» án baıqaýynyń jeńimpazdary anyqtalyp, aldymen oblys ákiminiń arnaıy júldesi berildi. Aıtýly marapat Shardaranyń jas talanty Gúlmaral Jaqypbaıǵa tapsyryldy. Júldeli 3-orynǵa Arys qalasynyń týmasy Erdos Seıilhan laıyq dep tanyldy. Ekinshi orynǵa Jetisaıdyń úkilegen úmitin arqalaı kelgen arý Malıka Qaldybaı ıe boldy. Birinshi oryndy Keles aýdanynyń ánshisi Beksultan Otarbekov enshiledi. Al basty syı – bas júldeni Túlkibas aýdanynyń talanty – Baǵdat Nysanbaı jeńip aldy. Jeńimpazǵa 500 myń teńge qarjylaı syı-taralǵy tapsyryldy. Marapattaý rásimi, osy óner dodasynan túlegen jáne ózge de jergilikti óner juldyzdarynyń qatysýymen qorytyndy-konsertke ulasty.
Ǵalymjan ELShIBAI,
«Egemen Qazaqstan»
Túrkistan oblysy
