Mektepte sýret páninen sabaq beretin aǵaılary Petropavl qalasynda daryndy balalardy mýzykalyq-estetıkalyq baǵytta tárbıeleıtin óner kolledji kesheni jumys isteıtinin, sapaly bilim beretinin, eki qyzy osynda oqıtynyn aıtyp, barýlaryn qıyla ótingen. Bul usynys analary Saltanatqa oı salǵanymen, birden sheshim qabyldaýǵa júreksingen. Tórt jasynda asqar taý panalary qaıtys bolǵan qos qulynynyń kóz aldynda júrýin ishteı qalaǵan. Dese de áke aqylyna júginýdi jón kórgen.
Ermek aqsaqaldyń negizgi mamandyǵy sýretshilik-tuǵyn. Qyryq jyldan astam shákirt tárbıelegen onyń tájirıbesi de, ómirden toqyǵany da mol. Keńinen tolǵap, kesimdi sheshim aıtarda tamaǵyn bir qyrnap alatyn ádetimen óz oıyn bylaı sabaqtaǵan: «Atyń barda jer tany jelip júrip» degen eken babalarymyz. Tomaǵasyn sypyryp, qusqa salar jas qyran da bap tileıdi. Barmaqtaı baqtan góri taýdaı talapty arqalap, eńbektiń ashy dámin tatqan janǵa jemisi tátti keledi». Osylaısha jıenderine aq jol tilep, atalyq batasyn bergen.
Alaýlaǵan arman otyn tutatqan qos órim 2013 jyly atalmysh keshen quramyndaǵy mýzykalyq mekteptiń jetinshi synybyna qabyldanady. Búginde óner kolledjiniń eki kýrsyn támamdap, qııaǵa qııalaı salǵan órnekti izderi shyn talanttyń tasty da jaryp shyǵatynyn aıǵaqtaıdy.
– О́ner órinde ór minezdilik tanytýdy júrekpen sezinýge anamyzdyń úlken yqpaly boldy. Jastaıymyzdan bı úıirmesine qatystyq. Keıin án aıtýǵa, mýzykalyq aspaptarda oınaýǵa mashyqtandyq. Bul qasıetter segiz qyrly, bir syrly naǵashy atamyzdan juqqan sekildi,–deıdi ónerde de, ómirde de juptary jazylmaı kele jatqan egiz qyzdar.
Altynjan jýyrda Qurmanǵazy atyndaǵy ulttyq konservatorııa uıymdastyrǵan kishi olımpıadaǵa prıma-qobyz atalymy boıynsha qatysyp, ekinshi oryndy ıelendi. Buǵan respýblıkalyq «Jas talant», «Aq suńqar», «Kóshpendiler áýeni», halyqaralyq «Sibir juldyzdardy jaǵady» atty baıqaýlarda laýreat, dıplomant atanǵanyn qossaq, alǵan asýlary qomaqty ekeni birden ańǵarylady. Oblystyq fılarmonııa janyndaǵy «Álqıssa» ansamblinde óner kórsetedi. Altynshashtyń da jetken jetistikteri az emes. Sonyń bir mysalyna Reseıdiń Qorǵan qalasynda ótken halyqaralyq dodada Gran-prı jeńip alǵanyn aıtsaq ta jetkilikti. Sımfonııalyq orkestrdiń beldi múshesi.
Fortepıano, prıma-qobyz, klarnet, jetigen sekildi mýzykalyq aspaptardy jetik meńgergen egiz qyzdar úkilep qosqan talaı óner jarystarynda top jaryp, el namysyn abyroımen qorǵap keledi.
О́mir ESQALI,
«Egemen Qazaqstan»
PETROPAVL
