Al delegasııa quramyna Túrkııanyń Qazaqstandaǵy elshiligindegi áskerı attashesi polkovnık Jıýneıt Gıýmen jetekshilik etti. Al delegasııa quramynda Túrik Respýblıkasy Jandarmerııasynyń baılanys jáne aqparattyq júıeler basqarmasynyń bastyǵy general-maıor Engın Chyraqoǵly men Azııa aımaǵy boıynsha áriptestik jónindegi bólim basshysy maıor Jengız Iylmaz da boldy.
Áriptestik kezdesýdiń alǵashqy kúninde áskerı qonaqtar Qazaqstan Respýblıkasy Ulttyq ulanynyń Bas qolbasshylyǵynda bolyp, quqyqtyq áskerdiń qurylý tarıhymen, onyń maqsat mindeti men qurylymdyq ereksheligimen tanysty.
Sondaı-aq, delegasııa basshysy armııa generaly Arıf Chetın QR Ulttyq ulany Bas qolbasshysy general-leıtenant Rýslan Jaqsylyqovpen kezdesý barysynda Túrkııanyń áskerı oqý oryndarynda maman daıarlaý baǵyty men bilim berý isindegi áriptestikti damytýdyń jaı-kúıi talqylandy. Sonymen qatar, aǵymdaǵy jyldyń shilde aıynda qazaqstandyq delegasııanyń Stambýlda ótken kezdesýde kelisilgen birqatar jetistikter legin odan ári jalǵastyrý jóninde áńgime órbidi. Esterińizge sala keter bolsaq, atalǵan sapar aıasynda ekijaqty áriptestik aıasynda Qazaqstan Respýblıkasy tarapynyń Jandarmerııa ýchılıshesinde bilim alýshy kýrsanttaryn jyl saıyn 8 adamǵa deıin kóbeıtý kelisimi jasalǵan edi. Oǵan qosa, taraptar Túrkııanyń áskerı-oqý oryndarynan túlep shyqqan qazaqstandyq túlekterdiń odan ári Túrik Respýblıkasynyń akademııasynda jáne Túrkııa oqý oryndaryndaǵy arnaıy maqsattaǵy bólimshelerde áskerı mamandardy daıarlaý úshin (surmergender men jarylǵysh qarý mamandaryn, sýda júzý mamandaryn t.b.) oqý kýrstaryn uzartý jóninde kelisim jasalǵan bolatyn.
Delegasııa ókilderiniń resmı kezdesýi sońynda armııa generaly Arıf Chetın Qazaqstan Respýblıkasy Ulttyq ulany Bas qolbasshylyǵy ǵımaratynyń aýmaǵynda «Dostyq alleıasyn» ashyp, onda alǵashqy aǵashty otyrǵyzdy.
Sodan keıingi resmı sapar Ult Kóshbasshysy – Tuńǵysh Prezıdent atyndaǵy Ulttyq qoranys ýnıversıtetinde jalǵasyn tapty. Munda qonaqtar ýnıversıtettiń oqý-ádistemelik bazasy men materıaldyq áleýetimen tanysyp, mýzeıdi aralady. Sonymen qatar, ımıtasııalyq modeldeý ortalyǵy men QR QK Bas shtaby akademııasy men Ulttyq ulannyń biliktilikti attyrý fakýltetiniń jumysymen tanysty.
Resmı sapardyń ekinshi kúninde Túrik Respýblıkasy Jandarmerııasynyń Bas qolbasshysy armııa generaly Arıf Chetın men Qazaqstan Respýblıkasynyń Ishki ister mınıstri general-polkovnık Qalmuhanbet Qasymovtyń kezdesýi ótti.
Jalpy is-sharalar jelisi ózara túsinistikke negizdelgen jaǵymdy sıpata ótip, taraptar yntymaqtastyqty tereńdetý men belsendi júrgizýge yqylas tanytty. Sonymen qatar, quqyq qorǵaý salasyndaǵy qarym-qatynas deńgeıiniń bolashaqtaǵy baǵyt-baǵdary naqtylandy. Oraıly sátte Qazaqstan Respýblıkasy Ulttyq ulanynyń Eýropa men jerorta teńizi jandarmerııasy jáne áskerı dárejedegi quqyqqorǵaý organdary qaýymdastyǵy (FIEP) quramyna qosylýdyń jaı-japsary talqylandy.
Sodan soń túrkııalyq áskerıler Arnaıy jedel maqsattaǵy astanalyq brıgadanyń materıaldyq-tenıkalyq jaǵdaıymen tanysyp, áskerılerdiń turmysymen tanysyp, áskerı qarý-jaraq kórmesin tamashalady. Delegasııa ókilderi sapardyń sońǵy túıini retinde elordadaǵy Kemal Atatúrik tyndaǵy saıabaqqa baryp, eskertkishke gul shoqtaryn qoıdy.
