Tolassyz jaýǵan jaýynnyń kesirinen Astanadaǵy birqatar kósheler kólkigen sýdyń astynda qaldy. Sonyń saldarynan kóshedegi qozǵalys qıyndap, jaıaý júrginshiler men avtokólik ıeleri zardap shekti, qoǵamdyq kólik qozǵalysy qıyndady.
Baqytjan Saǵyntaev osy másele jóninde Elbasy tarapynan da birneshe ret oryndy syn-eskertýler aıtylǵanyn atap ótti. Qaladaǵy káriz júıesin túpkilikti sheshý týraly tıisti tapsyrmalar da berilgen. Ákimdik qaladaǵy jaǵdaıǵa tolyǵymen jaýap beredi ıaǵnı, tabıǵattyń osyndaı tosyn minezine daıyndyq úshin jáne qala qyzmetteri jumystarynyń tıimdiligi úshin de ákimdik jaýapty.
«Qala turǵyndary qalalyq kommýnaldyq qyzmetterdiń nashar jumystarynan zardap shekpeýi tıis», — dep B. Saǵyntaev, jylda sý basyp ketý jaǵdaılary bir kóshelerde: B. Momyshuly dańǵylynda, Turan dańǵyly men Uly Dala kósheleriniń qılysynda, «Baraev» jáne «Jastar» shaǵyn aýdandarynda jáne t.b. kóshelerde qaıtalanyp oryn alatynyn aıtty. Aıta ketý kerek, meteorologııalyq qyzmetterdiń boljamy boıynsha jańbyr uzaqqa sozylýy múmkin.
Ákimdiktiń osyndaı jaǵdaılardyń aldyn alýǵa jáne joıýǵa baǵyttalǵan sharalary týraly Astana qalasynyń ákimi Áset Isekeshev baıandady. Elorda ákimdiginiń aqparatyna sáıkes, sońǵy eki jylda qalanyń jaýyn-shashyndyq káriz júıesine qatysty aýqymdy jumystar atqarylǵan.
«Byltyr Turan – Uly Dala, 31 kóshe, Kóktal kenti, Myńjyldyq saıajoly, S. Seıfýllın kósheleriniń tazartý qurylystaryn aıaqtadyq», — dedi Astana ákimi.
Ákimdik máseleni erekshe baqylaýda ustap otyr. Á. Isekeshev Astanada barlyq júıeni teńgerimde ustap, nóserlik aǵyn qyzmetterimen aınalysatyn, jaýyn-shashyn káriz júıesin burý jónindegi kásiporyndy qurý josparda bar ekenin aıtty. Kásiporyndy «Astana–Tazalyq» negizinde qurý kózdelgen.
Máseleni qaraý qorytyndysy boıynsha Premer-Mınıstr Baqytjan Saǵyntaev Ulttyq ekonomıka mınıstrligine Astana qalasynyń ákimdigimen birlesip atalǵan máseleni pysyqtaýdy tapsyrdy. Ákimdikke jaqyn arada osyndaı jaǵdaılardyń aldyn alý, kommýnaldyq qyzmetterdiń jumysyn kúsheıtýge qatysty qajetti sharalardy qabyldaý tapsyryldy.
B. Saǵyntaev káriz júıesin, sý jınalatyn qudyqtardy der kezinde tazalaý máselelerin erekshe baqylaýǵa alyp, ár jaýyn jaýǵan saıyn sý astynda qalatyn aýmaqtarda endi qaıtyp mundaı jaǵdaıdy boldyrmaý úshin keshendi is-sharalar daıyndaýdy tapsyrdy.
Elordany damytýdyń besjyldyq josparynda Premer-Mınıstr jaýyn-shashyndyq káriz júıesine basymdyq berýdi tapsyrdy. Premer-Mınıstrdiń birinshi orynbasary Asqar Mamınge QR Úkimetiniń qaraýyna jiberilgenge deıin Bas jospardyń jobasyn qaıta qaraý tapsyryldy.
