Investısııalar jáne damý mınıstri Jeńis Qasymbek Baǵdarlamanyń iske asyrylýy óńdeý sektorynyń turaqtylyǵy men ósiminiń dınamıkasyna oń áserin tıgizetinin aıtty.
Máselen, óńdeý ónerkásibiniń úlesi JII-de 2015 jylǵa 11,6%-dan 2018 jyly 12,9%-ǵa deıin, ónerkásipte — 2015 j. 39,5%-dan 2018 j. 40,9%-ǵa deıin, eksport — 2015 j. 24,4%-dan 2018 j. 28,7%-ǵa deıin, tikeleı sheteldik ınvestısııalardyń aǵyny 2015 j. 15,5%-dan 2018 j. 17,6%-ǵa deıin ósti.
Budan ózge, J. Qasymbektiń aıtýynsha, ındýstrııalandyrý daıyn ónim shyǵarýǵa baǵyttalǵan óńdeý ónerkásibi salalaryndaǵy (hımııa ónerkásibi, mashına jasaý, jıhaz, qurylys materıaldarynyń óndirisi jáne t.b.) kásiporyndardyń sanyn arttyrýǵa múmkindik beredi.
«2018 jyldyń I jarty jyldyǵyn 2010 jylmen salystyrǵanda óńdeý salalarynda jumys isteıtin qosymsha 3,5 myń kásiporyn paıda boldy. Negizinen ósim mashına jasaý, azyq-túlik ónerkásibi, qurylys materıaldary kásiporyndary sanynyń ósýi esebinen qamtamasyz etildi. Olardyń jalpy somalyq úlesi óńdeý ónerkásibi kásiporyndarynyń jıyntyq ósiminde 50%-dan asty», dedi mınıstr J. Qasymbek.
Bıylǵy alty aıdyń qorytyndylaryn ótken jylǵy sáıkes kezeńmen salystyrǵanda óńdeý sektoryndaǵy óndiris 5,2%-ǵa artyp otyr. Oń dınamıkaǵa yqpal etetin negizgi draıverler: mashına jasaý, hımııa ónerkásibi, azyq-túlik ónimderi óndirisi, munaı óńdeý, metallýrgııa, qurylys materıaldarynyń óndirisi.
Investısııalar jáne damý mınıstriniń aıtýynsha, bıylǵy esepti kezeńde barlyq maqsatty ındıkatorlar boıynsha oń qarqyn baıqalady. Memlekettik baǵdarlama aıasynda kásiporyndarǵa júıeli qoldaý sharalaryn kórsetýdiń nátıjesinde jańa óndiristerdi iske qosý, jumys istep turǵan kásiporyndardy jańǵyrtý jáne keńeıtý sharalary jalǵasýda. Bıylǵy alty aıda Indýstrııalandyrý kartasy aıasynda 187 mlrd teńgege jýyq somaǵa 18 joba iske qosyldy, 1,8 myńnan astam turaqty jumys oryndary ashyldy. Ekinshi jarty jyldyqta jalpy somasy 1,1 trln teńge bolatyn 100-ge jýyq jobany iske asyrý josparlanyp otyr. Onda 12,2 myńnan astam jumys orny ashylady.
Qorytyndylaı kele, J. Qasymbek qazirgi tańda Memleket basshysynyń tapsyrmasy boıynsha Mınıstrlik jańa jahandyq tehnologııalyq úderisterdi eskere otyryp, 2020–2024 jyldarǵa arnalǵan ındýstrıaldy-ınnovasııalyq damý tujyrymdamasyn ázirlegenin atap ótti.
Indýstrııalandyrýdyń úshinshi besjyldyǵy boıynsha negizgi qaǵıdalar men tásilder eksportty damytý men ilgeriletýge ekpin jasaı otyryp, óńdeý ónerkásibiniń básekege qabilettiligin odan ári arttyrýǵa baǵyttalady. Tehnologııalar transfertine jáne óńdeý ónerkásibin sıfrlandyrýǵa aıryqsha nazar aýdarylatyn bolady.
О́z kezeginde ulttyq ekonomıka mınıstri Tımýr Súleımenov óńirlerdiń kásipkerligin qoldaý kartasynyń jobalarynyń iske asyrylýyna monıtorıng turaqty negizde júrgizilip jatqanyn atap ótti. T. Súleımenov I jarty jyldyqtyń qorytyndysy boıynsha Kásipkerlikke qoldaý kórsetý kartasynyń barlyǵy 18 jobasy iske asyrylsa, onda Kartanyń 60-70% jobalary II jarty jyldyqta paıdalanýǵa beriletinin aıtty. Bul JSQ-ǵa memlekettik saraptamany alýmen, materıaldar men jabdyqtardy jetkizýmen, ınjenerlik ınfraqurylymdy júrgizýmen, sondaı-aq qurylys-montajdaý jumystarynyń aıaqtalýymen baılanysty.
I jarty jyldyqtyń jobalary negizinen qurylys sektorynda, jeńil jáne hımııa ónerkásibinde júzege asyryldy. 1,8 myńnan astam jumys orny ashyldy. Karta jobalarynyń ekonomıkaǵa salymy 30 mlrd teńgeni qurady. Karta jobalarynyń mýltıplıkatıvtik áseri 14 mlrd teńgeni qurady.
Energetıka mınıstri Qanat Bozymbaev óz baıandamasynda QR ındýstrıaldy-ınnovasııalyq damytýdyń 2015–2019 jyldarǵa arnalǵan memlekettik baǵdarlamasy aıasynda alty joba iske asyrylyp jatqanyn atap ótti. Olardyń ishinde «Kondensat» AQ «K5 motorlyq otynyn óndirý», Pavlodar munaı óńdeý zaýytyn jańǵyrtý, Atyraý munaı óńdeý zaýytyn rekonstrýksııalaý jáne jańǵyrtý, Shymkent munaı óńdeý zaýytyn rekonstrýksııalaý jáne jańǵyrtý, polıpropılen óndirý zaýytynyń qurylysy.
Memlekettik baǵdarlamanyń óńirlerde iske asyrylý barysy týraly beınekonferensııa baılanysy arqyly Batys Qazaqstan oblysynyń ákimi A. Kólginov, Jambyl oblysynyń ákimi A. Myrzahmetov, Astana ákimi Á. Isekeshev, Almaty ákimi B. Baıbek baıandady.
Máseleni qaraý qorytyndysy boıynsha QR Premer-Mınıstri Baqytjan Saǵyntaev Elbasy óziniń Joldaýynda ındýstrııalandyrý jańa tehnologııalardy engizýdiń flagmanyna aınalýǵa tıis ekenin atap ótkenin eske saldy.
Bıyl jeti úlgilik sıfrlyq fabrıka qurý jobasyn iske asyrý josparlanǵan. Osyǵan oraı Premer-Mınıstrdiń orynbasary Asqar Jumaǵalıevke, ınvestısııalar jáne damý, aqparat jáne kommýnıkasııalar mınıstrlikterine atalǵan baǵytta birlesip jumystar atqarý qajet.
«Kásiporyndardy jańǵyrtý esebinen jańa joǵary tehnologııaly ónim shyǵarýǵa, túbegeıli jańa salalar qurýǵa jáne sol arqyly eksportty arttyrýǵa múmkindik týatynyn túsiný kerek», dep B. Saǵyntaev júıe quraıtyn jańa iri kásiporyndardy qurý men jańa ındýstrııalandyrý talabyna saı keletin kadrlardy daıarlaý qajettigin atap ótti.
Baqylaý jumystary QR Premer-Mınıstriniń birinshi orynbasary Asqar Mamınge júkteldi.
