Osy kúnderi quramynda televızııa jýrnalısteri, týroperatorlardyń ókilderi, shveısarııalyq fotograf-peızajshy Kaı Grossmann, brıtandyq saıahatshy, ári fotograf Djek Hardın, qazaqstandyq trevel-bloger Andreı Kýlagın tárizdi sheteldik jáne qazaqstandyq trevel-blogerleri bar komanda Almaty oblysynyń sulý tabıǵatyna tamsanyp qaıtty.
13 tamyzdan bastap joba qatysýshylary tabıǵı jáne tarıhı eskertkishtermen tamasha úılesken jerlerine baryp qaıtty. Mysaly, qupııasy áli tolyq ashylmaǵan Besshatyr qorymynda boldy, organ mýzykasyna uqsas dybys shyǵaratyn qasıetimen erekshelenetin Aıǵaıqumǵa bardy.
Týrısterdiń eń súıikti jerleriniń biri «Altynemel» ulttyq saıabaǵynda kóptegen tabıǵı eskertkishter bar. Bul saıabaqtyń bar sulýlyǵyn kórý úshin kóp ýaqyt qajet.
Saıabaqtyń shyǵys jaǵynda Altynemel jotasynyń kúngeıine qaraı ornalasqan Aqtaý jáne Qatýtaý taýlary bar. Olar bir ýaqyttarda osy mekende tolqyp jatqan muhıttyń túbindegi shógindilerden túzilgen. Shubar tústi topyraq jartasty ártúrli túske boıaıdy. «Biz munda aıda júrgendeımiz», - dep áserlerimen bólisti ekspedısııa músheleri.
Saıahatshylar Aqsý aýdany aýmaǵyndaǵy Baıanjúrek taýlaryna baryp, ejelgi temir dáýirinde jartasqa salynǵan sýretterdi tamashalady. Bul taý batystan shyǵysqa qaraı sozylyp jatyr, onyń uzyndǵy shamamen 20 km, al bıiktigi 2079 metrge deıin jetedi. Jetisý Alataýynan Baıanjúrekti Qasqaraý dalasy bólip jatyr. Ońtústik batys jaǵyndaǵy shyńdar men úlken tastarǵa júzdegen sýret qashalyp salynǵan. Olardyń sıýjetteri men stıli Jetisýdaǵy osy tektes eskertkishterden ózgeshe. Jetisý Alataýynyń soltústik silemindegi Búıen ózeni dalasynda, shaǵyn ústirtte ejelgi qasıetti oryn – observatorııa bar. Bul - tastan qalanǵan, dıametri 97 metr bolatyn úlken sheńber. Onyń ortasynda muz dáýirinen qalǵan qoıtas jatyr, jáne tórt tarapqa: soltústik-ońtústik, batys-shyǵysqa baǵyttalǵan úlken tastar qoıylǵan.
Tek arnaıy daıyndalǵan jol tańdamaıtyn kólik qana júre alatyn 20 shaqyrym taý jolymen bizdiń qatysýshylar bıiktigi jaǵynan Orta Azııada ekinshi oryndy ıelenetin Burhan-Bulaq sarqyramasyna keldi. Sondaı-aq ekspedısııa baǵyty Jetisý Alataýynyń tólqujatyna aınalǵan Qora shatqaly arqyly ótti. Ol negizgi, soltústik jotanyń batysynda ornalasqan. Sapojnıkov muzdyǵynan Qaratal ózenine deıingi shatqaldyń uzyndyǵy – 70 km.
Jetisýdyń florasy men faýnasy, landshaftarynyń san alýandyǵy men sulýlyǵy ekspedısııa múshelerin erekshe áserge bóledi. Sonymen qatar, qatysýshylardyń usynysymen bastapqy baǵytqa túzetýler engizildi. Osy usynystar negizinde týrıstik kompanııalar Jetisý Alataýy mańaıyna eń ońtaıly týrlardy uıymdastyratyn bolady.
«Bul baǵyt tabıǵı jáne arheologııalyq eskertkishterge toly. Barlyq eskertkishterdi qamtıtyn mundaı uzaq týr sahtashylardan belgili bir fızıkalyq daıyndyqty talap etedi. Sol sebepti, biz, merzimi, kúrdelilik deńgeıi jaǵynan ártúrli birneshe baǵyt jasaıtyn bolamyz», - dedi ekspedısııa jetekshisi Ińkár Menaıaqova.
Jobany Mádenıet jáne sport mınıstrligine qarasty Týrızm ındýstrııasy komıtetiniń tapsyrysy boıynsha,Qazaqstan Respýblıkasynyń elordasy – Astana qalasynyń 20 jyldyǵyna oraı júzege asyrýshy «Kazakh Tourism» Ulttyq kompanııasy ekeni esterińizge salamyz.
Ekspedısııa qorytyndysy boıynsha «Kazakh TV» telearnasynda týrıstik nysandarǵa barý jóninde arnaıy baǵdarlama shyǵarylady. Ekspedısııanyń resmı medıa-seriktesi - «Habar» Agenttigi.
Ekspedısııanyń kelesi baǵyttary tómendegi oblystar boıynsha jalǵasady:
Qyzylorda, Aqtóbe, Mańǵystaý oblystary – Teńizden teńizge deıin;
Túrkistan, Jambyl, Almaty oblystary – Jańa Jibek joly.
«Jańa Jibek joly» baǵytyna National Geographic Reseı telearnasynyń toby qatysady.
