Poezııa keshine qazaq aqyndarynan bólek fınlıandııalyq aqyn, esseshi, slavıan, orys ádebıetiniń aýdarmashysy Iýkka Mallınen, aqyn, Shanhaı ýnıversıtetiniń professory Oýıang Iý (Avstralııa), aqyn, baspager Gagık Davtıan (Armenııa), aqyn, prozashy, synshy, «Lıteratýrnaıa gazetanyń» Bas redaktory Maksım Zamshev (Reseı), aqyn Akbar Ryskýlov (Qyrǵyzstan), fransýz jazýshysy, pýblısıst jáne aýdarmashy Terrı Marınıak, aqyn, baspager, sýretshi Malgojata Mahlevskaıa (Polsha), aqyn Lıýbov Krasavına (Reseı), aqyn Sergeı Mnasakanıan (Reseı) sııaqty sóz zergerleri qatysty.
Elorda aspanynan jyr jaýǵan keshtiń shymyldyq sózin ashqan Arystanbek Muhamedıuly: «Búgin qazaq ádebıeti úshin aıtýly kún. Astana qalasynyń 20-jyldyq mereıtoıyna oraı álem aqyndarynyń qatysýymen «Aq ordaly – Astanam» halyqaralyq poezııa keshi bastaldy. Sheteldik aqyndarmen qatar otandyq ádebıet áleminiń maıtalmandary, búginginiń aqıyq aqyndary Astanaǵa óleń arnap, Qazaq eli jaıly qalam terbep jatyr.
Prezıdent Nursultan Ábishuly: «Bolashaqqa baǵdar: rýhanı jańǵyrý» aty baǵdarlamalyq maqalasynda: «Rýhanı jańǵyrýdyń basty sharty – mádenıetimiz ben ulttyq kodymyzdy saqtap qalý. Onsyz rýhanı jańǵyrý qur jańǵyryq bolyp qalady» dep basa aıtty. Elimiz júrgizip otyrǵan saıasatta mádenıetke asa kóńil bólingen. О́skeleń urpaqty tárbıeleý, ulttyq mádenı murany nasıhattaý maqsatynda ádebıetimizge ıdeologııalyq mán berilgen. Qazaqstan, Astana jáne Elbasy týrasyndaǵy taqyryptyń qozǵalýy jáne olardyń qazaq, aǵylshyn, orys tilderine, sondaı-aq BUU maquldaǵan resmı shet tilderine aýdarylýy biz úshin úlken mártebe bolmaq", –dedi
Jazýshylar odaǵy Basqarmasynyń tóraǵasy Ulyqbek Esdáýlet te keshke qatysqan aqyndar men elordalyq aǵaıynǵa aqjarma tilegin aıtty: «Qasıetti Saryarqa dalasynda, Elordamyzdyń tórinde «Aq ordaly Astanam» atty halyqaralyq iri festıvaldiń uıymdastyrylýy jáne oǵan qazaq aqyndarymen qosa, alys-jaqyn shetelden qalamgerlerdiń tartylýy Astanamyzdyń 20 jyldyq mereıtoıyna úlken syı dep bilemin.
Mine, bes kúnnen beri Astananyń jupar aýasyn jutyp, aqynnyń óleń joldaryndaı sulý ǵımarattaryna tamsanyp júrmiz. Kúni keshe kelgen qonaqtar Býrabaıǵa, Baıanaýylǵa baryp, qazaq dalasynyń qasıeti men qasterin uǵynǵandaı bolyp qaıtty. Ásirese, shetelden kelgen kelgen qonaqtardyń áseri erekshe. «Astana búginde – Qazaqstan jetistigi men jeńisteriniń sımvoly» – dep Elbasymyz N.Ábishulynyń aıtqany esh shúbásyz shyndyq. Jańa astana salý ıdeıasynyń avtory Elbasymyzdyń «Rýhanı jańǵyrý» tarıhı strategııalyq baǵdarlamasy mine, ózderińiz kýá bolyp júrgendeı qazirdiń ózinde nátıjesin berýde.
Bul shara da «Rýhanı jańǵyrýdyń» kórinisi. Aqyndar da, halyq ta ishteı túlep, jandary nurlanyp jatqany kózderinen-aq kórinip tur. «Aq ordaly Astanam» jyr keshine jınalyp, aqyndardyń jyryna sýsap otyrǵan Astanalyq aǵaıynnyń aqedil kóńiline myń alǵys! Búgingi kún Astanamyzdyń tóbesinen jyr jaýǵan kún bolsyn!», dedi Jazýshylar odaǵynyń tóraǵasy.
Halyqaralyq poetıkalyq keshtiń negizgi maqsaty – Qazaqstan halqynyń birligin saqtaý jáne bizdiń elimizdiń mádenı erekshelikteriniń ártúrliligin damytý, Qazaqstan halqynyń dostyǵy, birligi men patrıotızmin nyǵaıtý, Qazaqstannyń maqtanyshy, beıbitshilik pen tózimdilik sımvoly, eýrazııalyq mádenıet ortalyǵy – Astanany «Álemniń qalasyn» kórsetý.
Is-shara barysynda shyǵarmashylyq kesh uıymdastyrylyp, «Rýhanı Jańǵyrý» aıdarymen «Álem aqyndary Qazaqstandy jyrlaıdy» atty shyǵarmalar jınaǵy jaryqqa shyqpaq.
Baǵashar TURSYNBAIULY,
«Egemen Qazaqstan»
