Eýropadaǵy tarıhy tereńnen tamyr tartatyn kóne festıvalderdiń biri, bıyl osymen 75-shi márte uıymdastyrylyp otyrǵan Venesııa halyqaralyq kınofestıvaliniń ótý merzimimen (Mostra Internazionale d’Arte Cinematografica) tuspa-tus kelgen aıtýly is-shara qazaq kıno mádenıetin álemdik óner keńistiginde tanytýǵa úlken jol ashpaq.
– Bul shara bizdiń kınomyz ben mádenıetimizdiń damýyna áser etetindikten, qazaq kınematografısteri men mádenıet qaıratkerleri úshin óte mańyzdy oqıǵa bolyp otyr. Osyǵan oraı, kórkem ónerdi baǵalaı biletin Venesııa qalasyna shaqyryp, bizdiń kınematografııamyzdy tanystyrýǵa múmkindik bergeni úshin ıtalıandyq ANICA halyqaralyq departamentiniń basshysy Roberto Stabılege alǵysymdy bildiremin. Bizdiń sharamyz tarıhy tereń jáne bedeldi Venesııa kınofestıvali ótip jatqan ýaqytta uıymdastyrylǵany kóńil qýantady, – dep halyqaralyq «Eýrazııa» kınofestıvaliniń prezıdenti Aıman Musaqojaeva mádenı joba jaıynda óz pikirin bildirdi.
Qazaqstan men Italııa arasyndaǵy mádenı, rýhanı dostyq qarym-qatynastyń aıqyn úlgisin tanytar aıtýly shara aıasynda sońǵy jyldary túsirilgen otandyq kınofılmder eýropalyq kórermen nazaryna usynylady. Atap aıtar bolsaq, rejısser E.Baıǵazınniń «О́zen», H.Ahmetovtiń «Árýaq», Dj.Vespanyń «Ámire», B.Qalymbetovtiń «Talan», R.Ábdirashevtiń «Almas qylysh», S.Qurmanbekovtiń «Oralman», T.Temenovtiń «Bizdiń qalanyń kishkentaı hanzadasy», J.Jetirýovtiń «Shyńyraý», E.Tursynovtyń «Jat», A.Sataevtyń «Anaǵa aparar jol» jáne «Ol» atty qos birdeı kınokartınasymen qatar, anımasııalyq týyndylardan: A.Ábildınovtiń «Kúltegin», A.Beısembaevtyń «Jumper», T.Maıdan, T.Tóleýǵazynyń «Muzbalaq» fılmderiniń resmı treılerleri kórsetiledi.
Sondaı-aq shara barysynda Mádenıet jáne sport mınıstrligi quryltaıshysy bolyp tabylatyn Ortalyq Azııadaǵy eń iri kınoforýmdardyń biri – «Eýrazııa» kınofestıvaliniń álemdik deńgeıdegi tanystyrylymy ótedi. Venesııaǵa baratyn delegasııa quramynda Bolat Qalymbetov, Toqtar Qarsaqbaev, Talǵat Temenov bastaǵan rejısserler men akter Sanjar Mádıev jáne ózge de kıno salasynyń mamandary bar. О́ner qaıratkerleri ıtalıandyq kınosúıer qaýymǵa qazaq óneri men mádenıetin keń aýqymda tanystyryp, ulttyq qundylyqtarymyz jaıynda tushymdy ári jan-jaqty aqparat beretin bolady.
Joǵaryda atap ótkenimizdeı, aıtýly óner saparynyń taǵy bir qýanyshty jańalyǵy – dál osy ýaqytta ótetin 75-i Venesııa kınofestıvaliniń «Kókjıek» atty konkýrstyq baǵdarlamasynda Qazaqstan atynan Emır Baıǵazınniń «О́zen» kartınasy baq synasa, «Qysqa metrajdy fılmder» atalymynda rejısser Eldar Shıbanovtyń 19 mınýttyq týyndysy saıysqa túsetin bolady. Italııanyń eń kóne de aýqymdy kınofestıvaline qatysýǵa joldama alǵan qos fılmniń de juldyzy janyp, júldegerler qatarynan kórinetinine halyqaralyq «Eýrazııa» kınofestıvaliniń prezıdenti Aıman Musaqojaeva zor senim bildirdi.
Nazerke JUMABAI,
«Egemen Qazaqstan»
