Jyl ótken saıyn otandyq bilim berý salasy kóptegen jańashyldyqpen erekshelenýde. Elimiz boıynsha jańartylǵan bilim berýge kóshý jalǵasyn taýyp, jańa býyn oqýlyqtary engizildi. Sonymen qatar búginde sapaly bilim berý arqyly ozyq oıly jas býyndy qalyptastyrý ýaqyt talaby bolyp otyr. Osy oraıda memleket tarapynan tıisti qoldaý kórsetilip, bilim salasyna qamqorlyq artty. Talaı jastyń shetelde bilim alýyna múmkindik jasaǵan «Bolashaq» halyqaralyq baǵdarlamasyna 25 jyl toldy. Nátıjesinde shırek ǵasyr ýaqyt ishinde jastardyń jańa býyny qalyptasty deýge bolady. Sonymen qatar Nazarbaev zııatkerlik mektepteriniń qurylǵanyna 10 jyl bolsa, «Daryn» mektepteriniń ashylǵanyna 20 jyl bolyp otyr. Bir sózben aıtqanda, bıyl bilim salasy úshin mereıli jyl deýge bolady.
Sol sııaqty, aǵymdaǵy jyl Jambyl oblysynda da bilim salasynda tabysty boldy. Jańa oqý jylynda 9 mektep paıdalanýǵa berildi. Osy ýaqytqa deıin Taraz qalasyndaǵy «Báıterek» yqshamaýdanynda mekteptiń joqtyǵy úlken másele retinde talaı ret kóterilgen bolatyn. Endi mine, atalǵan yqshamaýdannan jańa mektep boı kóterdi. Sonymen qatar oblys ortalyǵynan №24 mektep pen shahar quramyndaǵy Shóldala ıininen taǵy bir jańa mektep paıdalanýǵa berildi. Talas aýdanynyń Qasqabulaq aýylynan da Qasqabulaq orta mektebi, Merki aýdanynyń Teskentoǵan aýylynan №23 orta mekteptiń jańa ǵımarattary salyndy. Qordaı aýdanynyń Kóktóbe aýylynan №40 mektep pen Soǵandy aýylynan №33 mektep halyq ıgiligine berildi. Al Jýaly aýdanynyń Qyzylaryq aýylynan Y.Altynsarın atyndaǵy №17 orta mektep pen Baızaq aýdanynyń Baızaq aýylynan №4 mektep ǵımaraty salynyp, jergilikti halyqtyń kóńiline keremet kúı syılady. Jambyl óńirindegi mektepterdiń ashylý saltanatyna oblys ákimi Asqar Isabekuly qatysyp, jańa býyn jastardyń bilim alýyna barlyq jaǵdaıdyń jasalǵanyn, sondyqtan da tek sapaly bilim alyp, bolashaqqa bet túzeý kerektigin aıtty.
Bilim arqyly bilik qalyptasady. Búgingi jastardyń, erteńgi el azamattarynyń boıyndaǵy parasattylyq pen kemeldik mektep qabyrǵasynda júrgende qalyptasatyny sózsiz. Sondyqtan da memleket tarapynan kórsetilip otyrǵan tıisti qoldaý men qamqorlyqty keleshekke tartylyp otyrǵan ınvestısııa deýge bolady.
– Oblysta bilim berý júıesin damytýǵa erekshe nazar aýdarylýda. Atalǵan salany qarjylandyrý maqsatynda aǵymdaǵy jyly 106,1 mıllıard teńge bólindi. Bul kórsetkish ótken jylmen salystyrǵanda 8,0 prosentke artyq. Onyń 7,4 mıllıard teńgesi bilim berý nysandarynyń qurylysy men kúrdeli jóndeýge arnalǵan. Nátıjesinde apatty jaǵdaıdaǵy 3, úsh aýysymda jumys isteıtin 3 jáne oqýshy orny tapshylyǵy bar 3 mekteptiń máselesi sheshilip otyr, – deıdi oblystyq bilim basqarmasynyń basshysy Rahııa Turmahanbetova.
Jambyl óńirinde jańa oqý jylynda 447 mektep jumys istep tur. Al bıyl 14 bilim berý mekemeleriniń qurylysy júrgizilgen bolsa, jańa oqý jylynda 9 mektep paıdalanýǵa berildi. Al qalǵan 5 bilim oshaǵy kelesi jyly paıdalanýǵa beriledi dep josparlanýda.
Hamıt ESAMAN,
«Egemen Qazaqstan»
Jambyl oblysy
