Ýnıversıtet rektory Erlan Sydyqov: «Shárbaný Beısenova – qazaq ádebıetine úlken úles qosqan, jazýshy, jýrnalıst. Uzaq jyldar «Mádenıet jáne turmys», «Qazaqstan áıelderi» jýrnaldarynda jemisti qyzmet etip, tól mádenıetimiz ben ádebıetimizge aıryqsha eńbek sińirdi. Búgingi kezdesý stýdentter úshin aıryqsha kún, erekshe kezdesý retinde esterinde qalady dep oılaımyn. Shárbaný Qonaqbaıqyzynyń eńbek joly men óner jolyn baǵalap, ýnıversıtetimizdiń eń joǵary nagradasy «Kúltegin» medalimen marapattaımyz. Shyǵarmashylyq jolyna tabys tileımiz», dedi.
Shárbaný Beısenovaǵa stýdentter tarapynan mol, qyzyqty suraqtar qoıyldy. О́ner jolyn áńgime jazýdan bastaǵan jazýshy, Qazaq ulttyq ýnıversıtetiniń jýrnalıstıka fakýltetine onynshy synypty bitire salyp, aýdandyq gazettiń joldamasymen birden qabyldanǵan. Qazaq tarıhyndaǵy batyr analar, erjúrek arýlar týraly shyǵarmalar serııasyn jazyp, ónimdi eńbek etip júrgen qalamger, osy taqyrybyn áli de indetip, tereńdetip jazatynyn aıtty.
О́mirlik serigi, qazaq ádebıetiniń kórnekti ókili, synshy Saǵat Áshimbaevpen birge keshken sáýleli ǵumyry týraly da syrt shertken jazýshy stýdentterdiń barlyq suraǵyna rııasyz jaýap berip, kezdesýdi uıymdastyrýshylar men tyńdaýshylarǵa alǵysyn aıtty.
Kesh barysynda Shárbaný Beısenovanyń shyǵarmashylyǵy týraly fılologııa ǵylymdarynyń doktory Janat Áskerbekqyzy oı-pikirin bildirip, Serik Turǵynbekuly arnaý jyryn tartý etti.
Tirshiligin qalybynda, ómir men óner jolynda kórgeni mol, túıgeni kóp qazyna keýde úlkenderimizben suhbattasý jastarǵa qashanda qyzyq, qashanda azyq bolyp qala beredi.
Baǵashar TURSYNBAIULY,
«Egemen Qazaqstan»
