Kitapta Ábý Nasyr ál-Farabı jáne onyń arǵy-bergi izbasarlary men muralary, olardyń ózi jáne otbasy tutynǵan qolóner buıymdary men turmystyq zattary, sharýashylyq qural-saımandary, Otyrardyń qupııa kómbeleri, sondaı-aq 1930 jylǵa deıin Arystanbab kesene-meshiti janynda rýhanı aǵartý oshaǵy bolǵan shaǵyn musylman kitaphanasy, Elbasynyń kıeli óńirge saparlary men zııaly qaýymmen kezdesýi, ulylardyń ulaǵatty izin jalǵap kele jatqan býynnyń da ótkenge iz qaldyrar isteri týraly sóz bolady. Derekter qazynasyn qundy kitap etip, kópshilikke usynǵan memleket jáne qoǵam qaıratkeri Qýanysh Aıtahanov jáne ádebıet zertteýshisi, Mádenıet qaıratkeri Abdýlla Jumashev.
Ejelgi Otyrar qalasynyń dúnıejúzilik órkenıetke qosqan úlesi, ondaǵy alar orny búkil álemge aıan. «Ǵalymdardyń aıtýynsha, jazba deregi az, biraq eskertkishterge eń baı elmiz. Jazba deregimiz jıyrma prosent desek, 80 prosent tarıhymyz eskertkishterde tur. Elimizdiń qaısy bir tóbesi men jádigerleriniń syryna úńilseńiz tunyp turǵan tarıhy bar. Al Otyrar jaıly az aıtylyp, jazylyp jatqan joq. Biraq sol derekterdiń báriniń basyn qosyp, keler urpaqtyń enshisine qaldyrý jumysy Otyrar aýdanynyń týmasy, qoǵam qaıratkeri Qýanysh Aıtahanovtyń bastamasymen júzege asty. «Otyrar jádigerleri» bıyl derektermen, tarıhı qundylyqtar jaıly aqparattarmen tolyqtyrylyp, úlken ensıklopedııa túrinde jaryqqa shyqty», deıdi «Rýhanııat Ábý Nasyr ál-Farabı» mýzeıiniń negizin qalaýshy Abdýlla Jumashev.
1000 dana taralymmen jaryq kórgen «Otyrar jádigerleri» kitap-albomyna qyzyǵýshylyq tanytyp, oń pikirlerin bildirýshiler kóp.
Ǵalymjan ELShIBAI,
«Egemen Qazaqstan»
Túrkistan oblysy
