Foto: Maıgúl SULTAN
Qoǵamdyq damý mınıstrligi men «Qazaqstandaǵy áleýmettanýshylar qaýymdastyǵy» qoǵamdyq uıymy uıymdastyrǵan is-shara aıasynda jas áleýmettanýshylar forýmy, jergilikti atqarýshy organdar men jergilikti BAQ ókilderine arnalǵan trenıngter jáne tájirıbeli semınar ótkizildi.
Astana qalasynyń 20 jyldyǵyna arnalǵan plenarlyq otyrysqa Prezıdent Ákimshiligi Basshysynyń birinshi orynbasary, Qazaqstandaǵy áleýmettanýshylar qaýymdastyǵynyń prezıdenti Marat Tájın, Qoǵamdyq damý mınıstri, saıasattaný ǵylymdarynyń doktory Darhan Káletaev, Halyqaralyq áleýmettanýshylar qaýymdastyǵynyń (HÁQ) vıse-prezıdenti, áleýmettaný doktory, Rıo-de-Janeıro (Brazılııa) Federaldy ýnıversıtetiniń professory, HÁQ Current Sociology jýrnalynyń redaktory Eloıza Martın, Japonııa, Túrkııa, Reseı, BAÁ, Germanııa ókilderi, Parlament depýtattary, memlekettik organdardyń, joǵary oqý oryndarynyń, saraptamalyq qyzmetterdiń ókilderi qatysty.
Marat Tájın túrli ǵylymdardy toǵystyrǵan salanyń kóterer júgi aýyr ekenin aıta kelip, jańǵyrý strategııasyndaǵy áleýmettanýshylardyń róline toqtaldy. Jıynda «Rýhanı jańǵyrý» baǵdarlamasynyń búkil qoǵamdy qamtýyndaǵy áleýmettaný ǵylymynyń róli aıtylyp, Elbasy baǵdarlamasyndaǵy qoǵamdyq sanany jańǵyrtý mindetine áleýmettanýshylardyń da qosar úlesi zor ekeni atap ótildi. Áleýmettik ǵylymı jumystar sapasynyń syn kótermeýi, zertteý jumystarynyń az júrgizilýi, keń kólemde júrgizilgenniń ózinde qoǵamdyq qoldanysqa enbeýi de osy saladaǵy ózekti máselelerdiń biri. Sondyqtan jıynǵa qatysýshylar shetelden kelgen sarapshy mamandarmen ózara jıi tájirıbe almasý máselesin kóterdi. Sondaı-aq elimizdegi ýrbandalý prosesi sóz bolyp, oǵan az ýaqyt ishinde elimizdiń ár óńirinen jınalǵan halyqtyń tutas bir elordany quraǵany mysal boldy.
Jıynda azamattyq qoǵamdy damytý, «Rýhanı jańǵyrý» baǵdarlamasyn iske asyrý jáne BUU Damý baǵdarlamasy aıasyndaǵy áleýmettik zertteýlerdiń tanystyrylymy jóninde paneldik sessııalar ótti.
Aıta keteıik, kongress jumysynyń qorytyndy materıaldary Qazaqstandaǵy áleýmettanýshylar qaýymdastyǵynyń «Áleýmettaný-Sociology» jýrnalynyń arnaıy basylymynda jarııalanady.
Maıgúl SULTAN,
«Egemen Qazaqstan»
