Qazannyń 25-26 kúnderi elordada ótetin Almaty deklarasııasynyń 40 jyldyǵyna arnalǵan jahandyq konferensııa qarsańynda óner juldyzdaryna berilgen bul ataqtyń máni zor. О́ıtkeni jurt tanymal tulǵalarǵa qarap boı túzeıdi, jastar olarǵa elikteıdi. Osy turǵyda halyq nazaryndaǵy ánshiler men akterlerdiń kúndelikti durys tamaqtanyp, sportpen aınalysýy adamdardy salaýatty ómir súrýge tez jeteleıtini anyq. Memleket basshysy Nursultan Nazarbaev «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda buqaralyq sport pen dene shynyqtyrýdyń qoljetimdiligin arttyrý boıynsha Úkimet pen ákimderge naqty tapsyrmalar bergeni belgili. Al bul salada isteletin jumystarǵa búgingi «Densaýlyq elshileriniń» qosar úlesi de az bolmaq emes.
«Elbasy óz Joldaýynda qazirgi kúni densaýlyq saqtaý salasy men medısınalyq qyzmettiń sapasy halyqty mazalap otyrǵan eń basty másele ekendigin atap ótken bolatyn. Árıne, bizdiń medısına salamyzda másele kóp. Biraq, ár adam densaýlyǵynyń 50 paıyzy onyń salaýatty ómir súrýine tikeleı baılanysty ekendigi ǵylymı turǵyda dáleldengen. Qazaqta «Aýyryp em izdegenshe, aýyrmaıtyn jol izde» degen sóz bar. Sondyqtan bizdiń mınıstrliktiń strategııasynda aýrýlardyń aldyn alý mańyzdy baǵyt. Sońǵy jyldary dene shynyqtyrýmen aınalysatyn adamdardyń sany artyp keledi. Durys tamaqtaný máselesi de jıi kóteriledi. Biz osy jumysqa halyq syılaıtyn sizder sııaqty tanymal azamattardy qosýdy jón kórdik», degen mınıstr E.Birtanov «Densaýlyq elshisi» tósbelgisin ánshi, elimizdiń eńbek sińirgen qaıratkeri Qaraqat Ábildınaǵa, akter Nurlan Álimjanovqa, ánshi Qaırat Nurtasqa, ánshi, kásipqoı boksshy Ibragım Eskendirge, grek-rım kúresi boıynsha olımpıada chempıony Iýrıı Melnıchenkoǵa jáne «Sparta-Astana» KTK tobynyń kapıtany Danııar Jumadilovke taqty.
«Densaýlyq elshileri» Densaýlyq saqtaý mınıstrine alǵystaryn aıtyp, jańa bastamaǵa qoldaý bildiretindikterin jetkizdi. «Salaýatty ómir saltyn nasıhattaý – árbir azamattyń paryzy. Bul ataq bizge úlken jaýapkershilik júkteıdi. Mınıstrliktiń amanatyn halyqqa jetkizýde belsendi jumys atqaramyz. «Elshi» degen atymyzǵa laıyq eki araǵa altyn kópir bolýǵa kúsh salyp, sportpen aınalysatyn bolamyz», dep ýáde berdi ánshi Q.Ábildına.
Al akter Nurlan Álimjanov salaýatty ómir saltyn saqtaý tán saýlyǵymen qosa rýhanı jańǵyrýǵa da oń áser etetinin aıtty. «Kezinde Batyrhan Shúkenov BUU aıasyna keremet bastamalardy júzege asyryp, qanshama halyqty sońynan ertkeni belgili. Osyndaı úlken jaýapkershilikti bizge júktep jatqanyńyz bárimiz úshin mártebe. О́ner adamdary men aq halatty abzal jandardyń jurtshylyqty jaqsylyqqa shaqyrǵan ıgilikti isi jańǵyra bersin. Bul da bir rýhanı jańǵyrý dep bilemiz. О́ıtkeni adamnyń rýhy saý bolǵan kezde oı-sanasy da, deni de saý bolady», dedi ol.
Medısına salasynyń taǵy bir ózekti máselesi ana men bala densaýlyǵy ekenine toqtalǵan mınıstr Qaraqat Ábildınany halyq ánshi retinde ǵana emes, aıaýly ana dep te qurmetteıtindigin, «Ana men bala» baǵdarlamasyndaǵy istep jatqan jumystaryn joǵary baǵalaıtynyn atap ótti. «Árbir pende deni saý urpaqty tileıdi. О́kinishke qaraı, elimizde aıyqpas dertke shaldyqqan balalar kóp. «Ana men bala» baǵdarlamasyn júrgizý barysynda soǵan kózim jetti. Bul kóbinese júktilik kezindegi ketken qatelikterden týyndap otyr. Iаǵnı, bolashaq ana óziniń densaýlyǵyna selqos qaraıdy. Bul qazirgi tańda dabyl qaǵatyn másele. Sondyqtan kez kelgen bala súıgisi keletin áıel densaýlyǵyn kútip, balany josparly túrde dúnıege ákelýge daıyndalsa eken», dedi bes balanyń anasy Q.Ábildına.
Kezdesý sońynda Densaýlyq mınıstri «elshilerdi» 24 qazanda Astanadaǵy Botanıkalyq baqta ótetin «Sózden iske/Walkthe Talk/Ot slov k delý» aksııasyna qatysýǵa shaqyrdy.
Maıgúl SULTAN,
«Egemen Qazaqstan»
