Atyraý aspanynda kúı kúmbirledi

Jaıyq jaǵasynda úsh kún boıy kúı kúmbirledi. Qyr­ǵyz­stan, О́zbekstan, Reseı mem­le­ketterinen jáne eli­miz­diń túkpir-túkpirinen jınal­ǵan 600 ónerpaz Qurman­ǵazy rýhyn asqaqtatty. Uly kúıshi-kompozıtor Qurman­ǵazy Sa­ǵy­rbaıulynyń shyǵarma­shy­lyǵyn nasıhattaýǵa arnal­ǵan halyqaralyq orkestrler fes­tıvali Atyraý oblysy ákimi­niń tapsyrmasymen oblys­­tyq mádenıet, muraǵattar jáne qu­­jat­tama basqarmasynyń uıym­dastyrýymen ótti. «Bári óte joǵary deńgeıde ja­sal­ǵan, Atyraýǵa tabanymyz tı­gennen bastap qurmet pen qo­shemettiń qushaǵynda boldyq. Qazaq aspaptarynyń ózindik erekshe úni bar. О́nerdiń tili bir, osyndaı aýqymdy sharaǵa qatys­qanymyzǵa qýanysh­ty­myz», deıdi Reseıden kelgen «Skıf» kvartetiniń kórkem­dik jetek­shisi Aleksandr Mostykanov. 

Festıvaldyń alǵashqy eki kúni «Jastar» mádenıet úıin­de ótti. О́ner merekesine 15 orkestr ujymy qatysty. Shara shymyldyǵyn Atyraýdaǵy Dına Nurpeıisova atyn­daǵy akademııalyq ult aspaptar orkestri ashty. Odan keıin sah­naǵa kóterilgen kókshetaýlyq K.Kúmisbekov atyndaǵy ult aspaptar orkestri, aqtóbelik A.Jubanov atyndaǵy ult aspaptar orkestri, Pavlodardan kelgen R.Omarov atyndaǵy ult aspaptar orkestriniń ónerin Qyrǵyzstannan kelgen qonaq­tar «Mólmól» qomyzshylar ansambli jalǵady. Reseıdiń «Skıf» kvarteti, Aqtaý, Qos­tanaı, Astana qalalarynan kelgen óner ujymdary da Qur­manǵazy kúılerimen birge ózge de kompozıtorlardyń shyǵar­malaryn oryndap, kórermen qoshemetine bólendi. 

О́zbekstannyń «Sogdıana» halyq aspaptar orkestri, aty­raý­lyq «Naryn», Almaty­dan kelgen Qurmanǵazy atyn­daǵy memlekettik akademııa­lyq ult aspaptar orkestri festıvaldyń ekinshi kúninde óner kórsetip, Jaıyq jaǵasyn­da qudiretti kúı óneri saltanat qurdy. Bul qatarda tal­dy­qorǵandyq M.Tó­lebaev atyn­daǵy, oraldyq Dáý­let­kereı atyn­daǵy, qyzy­l­or­da­lyq Tur­maǵambet atyn­daǵy halyq aspap­tary orkestrleri de bar. 

Festıvaldyń gala-kon­sertin 2000-ǵa jýyq kórer­­men tamashalady. Qurmetti qonaq­tar qata­ryn­da Asanáli Áshi­mov, Ulyq­bek Esdáýlet, Qatı­mol­­la Berdi­ǵalıev, Júrsin Erman, Aıt­qalı Jaıymov, Ermek Qazıev, Aıgúl Úlken­baeva­­lardyń bolýy da shara­n­yń mańyzyn arttyra tústi. Gala-konsertte oblys ákimi Nurlan Noǵaev: «El­basy baǵ­darlamalyq maqa­la­syn­da «Árkim óziniń týǵan jerin, ólkesin jetik bilýi kerek. Týǵan jerden elge degen maxab­bat oıanady, elge qyz­met etý namysy oıanady» degen bolatyn. Ár úıdiń tórin­de tu­ra­tyn dombyranyń ar­qa­syn­da elimizdiń óneri, dás­túri, má­de­nıeti búginge deıin jetip otyr. О́nerimiz berik kezde má­de­nıetimizdi, dás­túri­­mizdi tanı bilip, dárip­tep, álem­dik jahandaný zama­nyn­daǵy jastarymyzdyń boıyna rýx sińire otyryp, elin, jerin qorǵaıtyn azamatty ósirý­de sizderdiń atqaryp júr­gen eńbekterińiz zor. Biz ózi­mizge júktelgen laýazymdyq mindetke sáıkes osy sharalardy uıymdastyramyz. Sonymen qatar ár adam azamattyq usta­ny­myna sáıkes bul isterdiń qos­shysy, jarshysy bolýy lázim», dep atap ótti. 

Gala-konserttiń ereksheli­gi – sahna tórinde 15 orkestr ujy­mynyń birigip óner kór­setýi boldy. Elimizdegi eń bel­gili dırıjerler Aıtqalı Ja­ıymov, Talǵat Kárimov, Na­z­y­m­bek Moldahmetov, Gúl­fara Izbanova, Abylaı Tilep­bergenov, Erkin Oralbekov, Arman Amanjolov, Qabıra Qabıjanova, Rahat Madreev, Rahıla Erǵalıeva, Saıa Juma­shevalar kezek-kezek sahna tórine kóterildi. 

Astana qalasy Memlekettik akademııalyq fılarmonııasy qazaq orkestriniń kórkemdik jetekshisi Aıtqalı Jaıymov: «Atyraý topyraǵynda dombyra ustaǵan dúldúlderdiń bas qosýy – Qurmanǵazy babamyzdyń ulylyǵyna qurmet. Dombyra­shy­lar qaı jerde bas qossa da, Qurmanǵazynyń kúıi kúmbir­leıdi. Bul da óner qudireti»,  deıdi. Uly dalanyń máńgilik úni osylaısha Atyraý aspanynda saltanat qurdy. Elbasy «Ulttyq dombyra kúnin» ja­rııa­laǵan jylda bul da bir jaq­sy bastama bolǵany anyq.

Baqytgúl BABASh,

«Egemen Qazaqstan»

ATYRAÝ