Memleket basshysy Qazaqstan men Reseı arasynda ózara senimge negizdelgen jáne qarqyndy damyp kele jatqan yqpaldastyqtyń strategııalyq sıpatyn atap ótti.
– Jaqynda Prezıdent Vladımır Pýtınmen kezdestim. Qazaqstan men Reseı arasyndaǵy baılanystar úlgi etýge turarlyq. Bizge osy qarym-qatynasty saqtaý qajet, – dedi Nursultan Nazarbaev.
Sonymen qatar, Qazaqstan Prezıdenti Eýrazııa ekonomıkalyq odaǵy, Ujymdyq qaýipsizdik sharty uıymy jáne TMD sııaqty halyqaralyq uıymdardyń aıasynda eki eldiń ózara yntymaqtastyǵyn nyǵaıtý máselelerine toqtaldy.
Memleket basshysy Qazaqstan men Reseı úkimetteriniń saýda-ekonomıkalyq qarym-qatynastardy jáne óńiraralyq baılanystardy nyǵaıtý isinde mańyzdy ról atqaratynyn atap ótip, eki jaqty yntymaqtastyqty damytýǵa qosqan úlesi úshin D.Medvedevke rızashylyq bildirdi.
Reseı Federasııasy Úkimetiniń tóraǵasy eki memleket arasyndaǵy ózara tıimdi qarym-qatynastardyń nátıjesinde Qazaqstan men Reseı arasyndaǵy saýda kólemi artqanyn aıtty.
– Qazaqstan – Reseıdiń strategııalyq seriktesi ári odaqtasy. Bizdiń qarym-qatynasymyz aýqymdylyǵymen jáne tarıhynyń tereńdigimen erekshelenedi. Joǵary deńgeıde ótkiziletin kóptegen kezdesýler, sondaı-aq úkimetterimiz ben bıznes qoǵamdastyqtarymyz arasyndaǵy jaqsy qarym-qatynastar – sonyń dáleli. Biz jyl boıy túrli basqosýlarda jıi júzdesemiz. Bul – qýantarlyq jáıt. Mundaı qatynastar bolmaıynsha, tolyqqandy ózara yqpaldastyq ornatý múmkin emes, – dedi D.Medvedev.
