Bul joba jastardyń ınnovasııalyq jáne kásipkerlik potensıalyn arttyryp, jastardy kásipkerlikke baýlý arqyly olardyń quzyrettik deńgeıin kóterýge baǵyttalǵan. Joba qatysýshylary kásipkerlik negizderin úırenip, bıznes-jospar daıyndaýda konsýltatıvtik qyzmet kórsetý men bıznes-josparlardy qorǵaý alańyn uıymdastyrýdy meńgerdi. Sonymen qatar, «Ideıalar jármeńkesi» baıqaýyna qatysty. Qatysýshylar oqý barysynda bıznestiń qyr-syryn meńgerip, bolashaqta júzege asyrǵysy keletin jobalaryn komıssııa aldynda qorǵap shyqty.
Nátıjesinde jańashyldyǵy men áleýmettik mańyzy jaǵynan sáıkes keletin 4 qatysýshynyń «Qaralma» taý-shańǵy kýrortynda týrıstik qyzmet kórsetý,
Jambyl oblysynyń tozǵan jáne tuzdalǵan jerlerinde fosfor, gıps jáne kóń negizinde bıomelıorant-ónimniń jańa túrin engizý, fetrden ázirlengen balalarǵa arnalǵan damytý kitapshalary men oıynshyqtaryn óndiretin shaǵyn seh jáne plastıkalyq qaldyqtardy qaıta óńdeıtin shaǵyn seh sııaqty jobalary iriktelip alyndy.
Komıssııa músheleriniń sheshimimen M.H.Dýlatı atyndaǵy Taraz memlekettik ýnıversıtetiniń doktoranty Dáýlet Egemberdıevtiń jobasy birinshi oryndy jeńip aldy jáne ol Granttyq qarjylandyrý baǵdarlamasyna usynylatyn bolady. Jas ǵalym topyraǵy tozǵan egistik alqaptary men tuzdalǵan jerlerdi qalpyna keltiretin jańa bıomelıorant oılap tapqan. Qazaqstanda aýyl sharýashylyǵy óndirisinde 2 mıllıon gektar egistik alqabynyń topyraǵy tozǵanyn eskersek, tozǵan topyraqty tıimdi paıdalaný úshin bıomelıoranttar men organıkalyq tyńaıtqyshtardy qoldaný qajet. Dáýlet Egemberdıev tuzdalǵan jerlerde topyraqtyń qunarlylyǵyn qalpyna keltirýdiń tıimdi ádisteriniń biri jańa bıomelıorantty paıdalaný bolyp tabylatynyn aıtady. «Bul ádisti júzege asyrý úshin joly óte qarapaıym. Energo únemdeýshi komponentter jergilikti shıkizat resýrstarynan quralǵan. Bir kılogramm bıomelıoranttyń ózindik quny 16 teńge. Bıomelıorantty paıdalanǵannan keıin egistik ónimdiligi 30-50 paıyzǵa deıin artady», deıdi ol.
Mundaǵy taǵy bir qyzyqty joba «Fetrden ázirlengen balalarǵa arnalǵan damytý kitapshalary men oıynshyqtaryn óndiretin shaǵyn seh» ashý boldy. «Jas kásipkerlik mektebiniń» qatysýshysy Syrǵalym Toıbaeva kıizden balalardyń aqyl-oıyn damytýǵa baǵyttalǵan túrli oıynshyqtar tigýmen aınalysady. Keıinnen balabaqshalar men ata-analar tarapynan suranys túse bastaǵanyn baıqaǵan ol tapsyrys qabyldap, oıynshyqtar men kitaptar tige bastaıdy.
«Biz 1000 teńgeden bastap 25000 myń teńgege deıingi qarajat aralyǵynda oıynshyqtar ázirleımiz. Iаǵnı, tutynýshynyń talǵamyna oraı barlyq tapsyrysty qabyldaımyz» , deıdi jas kásipker. Syrǵalym Toıbaeva «Jas kásipkerler mektebinde túrli tyń ıdeıalarmen tanysyp, bolashaq bıznesmenge qajet qasıetterdi meńgerip shyqqan.
«Baıqaýda baǵyn synaǵan ár qatysýshynyń tyńǵylyqty daıyndalǵandyǵy kórinip tur. Esep-qısaptary, marketıngtik jaǵynan eseptelýi, shyǵyn men kiris, kásipti júzege asyrý orny tıimdi tańdalǵan jáne bıznes bastaýdaǵy barlyq jaıttar jan-jaqty qamtylǵan. Bul eń áýeli Kásipkerler palatasynyń bıznes-trenerdiń eńbegi», – deıdi Jambyl oblysy Kásipkerler palatasynyń qarjylaı emes qoldaý bóliminiń basshysy Dıana Túkpetova.
Hamıt ESAMAN,
«Egemen Qazaqstan»
Jambyl oblysy
