Júldeli birinshi oryndy Qyzylorda qalasynan Dastan Aıtbaıdyń «Innovasııalyq qulaqqap «Safe headphones» jobasy jeńip aldy. Oǵan arnaıy dıplom men 300 myń teńgeniń sertıfıkaty tabys etildi.
Dastannyń qulaqqabyn naǵyz ınnovasııalyq joba dep aıtýǵa bolady. Búgingi jastardyń smartfonnan eki eli ajyramaıtyndyǵy belgili. Uıaly telefonyndaǵy áýenderdi symtetik arqyly qulaǵyna qystyryp, syrtynan qulaqqap kıip alǵan bozbalalar men boıjetkender tý syrtynan mashına kelip qalyp, sıgnalyn oıbaılatyp basqanymen estimeıdi. Ruqsat etilmegen jol qaltarystarynan shyǵa kelgen jasóspirimderdiń apatqa ushyrap jatqandary bar.
Úlkenderdi tyńdaǵysy kelmegen sol tustastaryn Dastan ónertapqysh moıyndatty. Dastan oılap tapqan qulaqqap ishinde qaýipsizdik sıgnaly bar. Avtomobıl, jol-kólik qyzmetkerleriniń, jedel-járdem mashınalarynyń sıgnaly iske qosylǵanda, qulaqqaptaǵy mýzyka birden toqtaıdy.
Jaqyndap qalǵan kóliktiń daýysyn ajyratyp, qaýiptiń kelip qalǵandyǵyn áýendi toqtatýmen bildiredi. Qaýiptiń aldyn alýǵa járdemdesetin mundaı qurylǵylardy kóptep daıyndaýǵa oblys ákimdigi men Qorqyt ata atyndaǵy Qyzylorda Memlekettik ýnıversıtetiniń basshylyǵy usynys bildiripti.
Dastannyń jobasy osylaısha birinshi orynǵa ıe boldy. Eki ekinshi oryndy qyzylordalyq Shyńǵyshan Sádýovtiń «Jarnama bıznes-ıdeıasy» men Syrdarııa aýdanynan О́mirzaq Esbolatovtyń «Saýyqtyrý ortalyǵy» jobasy bólisti. Úshinshi oryn «Tigin sehy» jobasynyń ıegeri shıelilik Gúlnur Úderbaevaǵa, «Logıstıkalyq ortalyq «Logo Center» jobasynyń avtory Ýálıhan Tasqara men «Kishkentaı hanymdar» mektebi» jobasynyń ıesi Aqbota Bazarbaıǵa buıyrdy.
Jeńimpazdar men júldegerlerdi oblys ákiminiń orynbasary Rýslan Rústemov arnaıy quttyqtady.
Baqtııar TAIJAN,
«Egemen Qazaqstan»
Qyzylorda oblysy
