Aıekeń 15 jyldan astam ýaqyt Aýyl sharýashylyǵy mınıstriniń orynbasary bolyp istedi. Ol kezde biz bir-birimizdi resmı jaǵdaılarǵa baılanysty ǵana bilip júrdik. Aıekeń shyn máninde aýyldyń jaǵdaıyn, sharýashylyǵyn óte jaqsy biletin adam edi. Jastaıynan aýylda ósip, onyń búkil bolmys-bitimin kózimen kórgen, keıin keńshar dırektory bolyp qyzmet istegen, aýyldyń adamy men sharýashylyǵyna neniń qajet, neniń qajet emestigin óz ómir tájirıbesi arqyly biletin maman bolatyn. Sol bilimi men tájirıbesiniń arqasynda ol mınıstrlikte óte abyroıly qyzmet atqardy.
Qazaqstanda maldy asyldandyrý isine úlken úles qosty. Ásirese qoıdy asyldandyrý isin durys ǵylymı jolǵa qoıýda Aıekeń úlken uıymdastyrý jumystaryn atqardy: ǵalymdardyń bul jumyspen úzbeı aınalysýyna jaǵdaı jasady, kómektesti, soǵan qajetti kúndelikti jumystardy erinbeı-jalyqpaı júıeli júrgizip otyrdy. Sondyqtan ony qyzmettesteri, oblys pen aýdandaǵy áriptesteri qatty syılap, ári maman, ári adam retinde joǵary baǵalaıtyn. Respýblıkamyzdyń túpkir-túpkirinde onyń tileýles adamdarynyń kóp bolý sebebi osydan.
О́tken ǵasyrdyń aıaǵynda aýyl sharýashylyǵy jumystarynyń, jalpy aýyl jaǵdaıynyń quldyrap ketýi Aıekeńniń qyzmet babyna da belgili dárejede yqpal etti. Ol kisi mınıstrdiń orynbasary qyzmetinen bosap, «Asyl» degen kompanııa qurdy. Ol kompanııanyń maqsaty Qazaqstandaǵy mal tuqymyn asyldandyrý jumystaryn júıeli túrde jalǵastyra berý edi. Biraq ol kezdegi jaǵdaı ondaı qajetti isti qoldaı almady, sol jaǵy ókinishti boldy.
Syılas azamatty ajalǵa qımasań da, ajaldan arashalap qalar amalyń joq. О́kinesiń, saǵynasyń, sondaı jaqsylar kóp bolsa eken dep tileısiń.
Mine, biz eline eleýli, halqyna qalaýly, kezinde memleketimizdiń órkendeýine úles qosqan, ártúrli memlekettik sharýashylyq qyzmetterdi atqarǵan ardaqty Aıekeńe − Aıyp Qısauly Qusaıynovtyń turǵan úıine ornatylatyn taqtanyń ashylýyna qatysyp otyrmyz. Bul máńgilik eskertkish, bolashaq urpaqqa úlgi bolatyn Aıyp sııaqty adamzattyń jarqyn beınesi qashanda bıikten kórine bersin.
Keńes AÝHADIEV,
memleket jáne qoǵam qaıratkeri
