Mádenıet jáne sport mınıstrliginiń qoldaýymen «Babadan amanat» atty dástúrli mýzyka festıvali aıasynda ótken «Dástúrli mýzyka: tarıh jáne teorııa máseleleri» atty halyqaralyq ǵylymı-tájirıbelik konferensııa ózine deıingi barlyq sharalardy ári tolyqtyryp, ári túıindegendeı boldy. Jıynǵa Mádenıet jáne sport mınıstrligi men Bilim jáne ǵylym mınıstrliginiń ókilderi, Qazaqstan, Reseı, О́zbekstan, Qyrǵyzstan sekildi kúıshilik óner qalyptasqan kórshi elderde kompozıtor murasyn zertteýmen aınalysatyn jáne kúı ónerin zerdeleıtin belgili ǵalymdar, tanymal mýzyka mamandary, sondaı-aq Astana, Atyraý, Oral qalalarynan arnaıy shaqyrylǵan qonaqtar qatysty.
Ǵylymı konferensııany ashqan ulttyq Konservatorııanyń rektory, Qazaqstannyń eńbek sińirgen qaıratkeri Arman Júdebaev qazaq ulttyq mýzyka ónerinde aıyryqsha oryn alatyn kúresker kúıshi, dáýlesker dombyrashy Qurmanǵazynyń rýhty shyǵarmalarynyń tabıǵaty men tarıhyna az-kem toqtalyp ótti. «Búgin bizdiń talaı dúldúldi baptaǵan kıeli shańyraǵymyzda kúıshi babamyz Qurmanǵazynyń 200 jyldyq mereıtoıy qurmetine eki birdeı úlken sharanyń shymyldyǵy túrilip otyr. Onyń biri «Babadan amanat» atty dástúrli mýzyka festıvali bolsa, endi biri osy festıval aıasynda alys-jaqyndaǵy mýzyka maıtalmandarynyń basyn qosyp, kúı jáne kúıshilik óner týraly ǵylymı paıym men tujyrymdamalar jasalatyn halyqaralyq ǵylymı konferensııa mádenıetimizdegi aıtýly oqıǵa bolyp otyr. Aldaǵy jyldy Elbasymyz «Jastar jyly» dep jarııalady, sol sebepti babadan qalǵan murany jastar jalǵastyrsyn, qasıetin-kıesin sezinsin degen nıetpen aýqymdy sharany stýdentterimiz ben jas ǵalymdarymyzdy qatystyra ótkizip otyrmyz. Ulttyq bolmysymyzdy jańǵyrtý múddesinde bul festıvaldiń mańyzy zor» dedi Arman Júdebaev.
Ǵylymı konferensııada Serjan Shákirat, Edige Nábıev, Almas Almatov, Qatımolla Berdiǵalıev, Aıtjan Toqtaǵanov, Orynbaı Dúısen sekildi belgili kúıshiler men jyrshy, folklor tanýshylar da qatysyp, Qurmanǵazy tulǵasy arqyly jalpy kúıshilik ónerdiń órisi men órkendeýi týraly salmaqty áńgime órbitti.
P.Chaıkovskıı atyndaǵy Máskeý memlekettik konservatorııasynyń professory, ónertaný doktory Vıoletta Iýnýsova Azııadaǵy dástúrli mýzyka tarıhynyń zamanaýı ǵylymı baǵyttarmen toqaılasýy týraly áńgimelese, dástúrli qazaq mýzyka mádenıetiniń mańyzy men damýy jóninde professor Saıda Elamanova oı órbitti.
Sondaı-aq konferensııada Dınanyń oryndaýshylyq máneri, Aqan seriniń ánderindegi sopylyq saryn, Jetisýdyń ońtústik-batysyndaǵy án folklorynyń qazirgi tańdaǵy jaı-kúıi, Syr óńirindegi jyraýlyq dástúrdiń zerttelýi, Arqa dombyrasynyń pernelik júıesi týraly mýzyka zertteýshileri men bolashaq ǵylym magıstrleri mazmundy baıandamalar jasady. Kúıdi oryndaý ónerindegi jeke talǵam da sóz bolmaı qalǵan joq. Máselen, Qazanǵap kúıshilik mektebiniń kórnekti ókili Baqyt Basyǵaraevtyń, kúıshi Rysbaı Ǵabdıevtiń, Qyzyrbek Janasylulynyń, Aıtbaı Muzdahanovtyń, Aıtqalı Jaıymovtyń, Maǵaýııa Hamzınniń, Quraqtyń Dosjanynyń kúıleri men ózine tán erekshelikterin, kúı ónerindegi orny men mýzykaǵa qosqan úlesin ónertanýshy mamandar qyzyqty derekter men málemetter negizinde áńgimelep berdi.
Aıgúl AHANBAIQYZY,
ALMATY
