Besigin án terbegen Qarataý – saýsaǵynan saz tógilgen dáýlesker kúıshilerdiń de mekeni. Qart Qarataýdyń qoınaýy Qorqyttan qalǵan saryndy jańǵyrtyp, Yqylastaı uly kúıshimen halqynyń qulaǵyn klassıkalyq qobyz kúılerine qandyrǵan jer. Sondyqtan I dıski dáýlesker kúıshi Yqylas Dúkenulynyń kúılerine arnalyp, radıohabarlar berildi.
Qara dombyrasymen el tarıhyn shejiredeı sarnatqan Súgir kúılerinen bastaý alyp, dástúrdiń jalǵasy ispetti kúılerdiń tańdaýly nusqalary sarysýlyq kúıshilerdiń oryndaýlarynda «Sarysý kúıshileri» degen ataýmen II dıskige endi. Jáne munda sarysýlyq kúıshilerdiń shyǵarmashylyq portretin ashatyn radıohabarlar da berildi.
Sarysýdan shyqqan kompozıtorlar men ánshiler esimi bul kúnde alty alashqa málim. Osy oraıda, osy óńirden shyqqan, qazaq ónerinde qaıtalanbas qoltańba qaldyrǵan kompozıtorlar Ilıa Jaqanov pen Tynyshbaı Rahym ánderi III, IV dıskilerge toptastyrylyp, birtýar ánshiler: Amangeldi Sembın men Sáýle Janpeıisovanyń oryndaýyndaǵy shyǵarmalar V-VI dıskilerge jınaqtalǵan. Al «Sarysý kompozıtorlary men ánshileri» atty VII-VIII dıskilerge atalǵan óńirdiń talantty ónerpazdarynyń shyǵarmalary engizildi.
Segiz dıskiden turatyn SD jınaq – asyl qazynamyzǵa janashyrlyq tanytyp, jaryqqa shyǵarýǵa demeýshilik jasaǵan belgili mesenat, kásipker Jeńis Toǵyzaqbaev. Joba keńesshisi – jazýshy, kompozıtor, óner zertteýshisi, Qazaqstannyń jáne Qyrǵyzstannyń eńbek sińirgen mádenıet qyzmetkeri Ilıa Jaqanov. Joba prodıýseri, ıdeıa avtory Qazaqstan Prezıdenti syılyǵynyń laýreaty, Memlekettik «Daryn» jastar syılyǵynyń ıegeri Bolatbek Tólepbergen.
«Egemen-aqparat»
