Ádebı jıynnyń maqsaty – qarymdy qalamgerdiń ómiri men shyǵarmashylyǵyn jurt jadynda jańǵyrtý, óskeleń urpaqqa nasıhattaý boldy.
Atalmysh keshti L.N.Gýmılev atyndaǵy Eýrazııa ulttyq ýnıversıtetiniń Qazaq ádebıeti kafedrasy jáne Qazaqstan Jazýshylar odaǵy uıymdastyrdy.
Basqosýǵa UǴA akademıgi S.Qasqabasov, QR Memlekettik syılyǵynyń laýreaty, aqyn N.Aıtuly, fılologııa ǵylymdarynyń doktorlary, professorlar S.Negımov, Q.Alpysbaev, R.Turysbek, belgili jazýshylar T.Ábdiraıym qatysyp, Erǵazy Rahımov týraly estelikterimen bólisti. Sondaı-aq, shara barysynda belgili ánshi Tursynǵazy Rahımovtyń «Aıagóz», «Aqbóken» syndy áýezdi ánderi oryndaldy.
Sonymen qosa Erǵazy Rahımovtyń 80 jyldyq mereıtoıyna arnaıy ótkizilgen músháıranyń da qorytyndasy jarııalandy. «Qazir qazaq poezııasy týraly ártúrli pikirler aıtylyp jatady. Biraq osy músháıraǵa kelip túsken óleńderden baıqaǵanym bizdiń ádebıetimizde tegeýrindi jas aqyndar ósip keledi. Erǵazy sııaqty aqyndaryń izbasarlary jetilip keledi», dedi Nesipbek Aıtuly. Qazylar alqasynyń sheshimi boıynsha bas júlde Nurbol Muratbekke, 1 oryn Qazbek Baıjumanǵa, 2 oryn Orazaı Jeńisuly men Qabıden Qýanyshbaıulyna, 3 oryn Edilbek Dúısen men Asylan Tilegenge buıyrdy. Yntalandyrý syılyqtaryna Úmitbek Baǵdatuly men Erjan Jumabek laıyq dep tanyldy.
Erǵazy Aqqazyulynyń lırıkalyq óleńderi, kórkem ocherkteri men qysqa áńgimeleri qazaq oqyrmanyna keńinen tanys. «О́kpeti órenderi», «Muńsyzbaıdyń muragerleri», «Súri qar», «Tentek kelin», «Terisaıryq» áńgimeler men povester jınaqtary, «Zeınel kúıi», «Jyrlaıdy júrek», «Ymyrt pen qobyz» óleńder men dastandar jınaqtary ár jyldary jaryq kórgen.
Baǵashar TURSYNBAIULY,
«Egemen Qazaqstan»
