Elbasy N.Nazarbaev óziniń "rýhanı jańǵyrý" baǵdarlamalyq maqalasynda: «Salt-dástúrimiz, tilimiz ben mýzykamyz, ádebıetimiz, joralǵylarymyz, bir sózben aıtqanda, ulttyq rýhymyz boıymyzda máńgi qalýǵa tıis» degen bolatyn. Osyndaı ulttyń uly muratyn arqalaǵan aıtýly jobanyń qorytyndy konsertine memleket jáne qoǵam qaıratkeri Myrzataı Joldasbekov jáne «Qazaqstan» RTRK» AQ Basqarma tóraǵasy Erlan Qarın qatysyp, «Men qazaqpyn» megajobasynyń jeńimpazdaryn terme, kúı, án janrlary boıynsha marapattady.
Sondaı-aq gala-konsertte «Men qazaqpyn» jobasynyń qazylar alqasynyń músheleri Uljan Baıbosynova, Aıgúl Úlkenbaeva, Aıgúl Elshibaeva jáne I - maýysymyndaǵy jeńimpaz Ardaq Eleýsiz óner kórsetti.
Aıta keteıik, Aqparat jáne kommýnıkasııalar mınıstriliginiń qoldaýymen «Qazaqstan RTRK» AQ birlesip alǵash ret 2017 jyly «Men qazaqpyn» halyqaralyq televızııalyq megajobasyn júzege asyrǵan bolatyn.
- Jobanyń maqsaty – elimizdiń túkpir-túkpirindegi dástúrli ánshi-termeshi, kúıshilerdiń basyn bir arnada toǵystyryp, elimizdiń ár aımaǵynda qalyptasqan óner mektepteriniń tańdaýly týyndylaryn dáripteý, atadan-balaǵa mura bolyp kele jatqan tól ónerimiz kúı, jyr-termeni damytyp, zamanǵa saı jańashalandyryp, óskeleń urpaqqa nasıhattaý, - deıdi arna basshysy Erlan Qarın.
Sonymen aqtyq synǵa joldama alǵan 9 úmitkerdiń ishinen sýyrylyp shyqqan tórt ónerpaz úzdik bolyp tanyldy. Kúnsulý Túrikpen úzdik termeshi atanyp 1 000 000 teńgeni qanjyǵalasa,Jənibek Jəmıev kúı atalymynda jeńimpaz bolyp, 1 000 000 teńge júldege ıe boldy. Al, dəstúrli ənshilerden eki úmitker úzdik atanyp, qazylar alqasy júldeni 500 000 teńgeden ekeýine bólip berdi. Sóıtip, Alpysbek Ońaıbaıuly men Raýan Əlimbaev dəstúrli ən atalymy boıynsha jeńimpaz boldy.
Ularbek NURǴALYMULY,
«Egemen Qazaqstan»
