Elbasy N.Nazarbaev jyl saıynǵy dástúrli Joldaýlarynda tehnıkalyq jáne kásiptik bilim berý júıesin barynsha damytý kerektigine mán berip keledi. Bul baǵytta birneshe jospar men is-shara júzege asyrylýda. Máselen, 2014 jyldyń tamyz aıynda Qazaqstan halyqaralyq WorldSkills qaýymdastyǵynyń 70-múshesi boldy. Osy baǵytta Bilim jáne ǵylym mınıstrligi men «Kásipqor» holdıngi» jumysshy mamandyqtarynyń bedelin arttyrý úshin 2015 jyldan bastap WorldSkills Qazaqstan ulttyq chempıonatyn uıymdastyryp keledi. Osyǵan oraı aǵymdaǵy jyldyń 4-7 jeltoqsan aralyǵynda kásiptik mamandyqtardyń bedelin arttyrý, jas kadrlardy ekonomıkanyń óndiristik sektoryna jumyldyrý jáne kəsiptik-tehnıkalyq bilimdi damytýǵa baǵyttalǵan WorldSkills Kazakhstan IV Respýblıkalyq Ulttyq chempıonaty ótkizilýde. Elimizdiń ár aımaǵynan kelgen 350-ge jýyq úmitkerdi 30 mamandyq boıynsha 400-den asa sarapshy baǵalaýda.
«WorldSkills – jumysshy kásibiniń mártebesin arttyryp qana qoımaı, kásibılikti nasıhattaýdy maqsat etetin kommersııalyq emes qozǵalys. Bul jastar arasynda úlken bedelge ıe. Búginde tehnıkalyq jáne kásiptik bilim berý sapasyn arttyrý – mınıstrlik alǵa qoıyp otyrǵan basty maqsattardyń biri. Jas mamandardyń kásiptik sheberligine qoldaý kórsetýge kásiporyndardyń ókilderi, jumys berýshi kompanııalar, sondaı-aq kolledj ben JOO stýdentteri jáne mektep oqýshylary qatysýda. Men barlyǵyna alǵysymdy aıtqym keledi. Jyl saıyn ulttyq chempıonatqa qatysýshylardyń sany artyp keledi. Biz qazir osy WorldSkills baǵdarlamasyn negizge ala otyryp barlyq kolledjde bilim beretin baǵdarlamalardy ózgertip, 500 oqýlyqty qazaq, orys tilderine aýdaryp, atalǵan baǵdarlama arqyly stýdentterge bilim beremiz», dedi Bilim jáne ǵylym mınıstri Erlan Saǵadıev.
Tórt kúnge sozylatyn chempıonat «Kirpish qalaý», «Boıaý jáne árleý jumystary», «Kondıterlik sheberlik», «Elektronıka», «Qonaq úı ákimshisi», «SBB stanoktaryndaǵy jonýshy», «Veb-dızaın», «Grafıkalyq dızaın», «Dızel qozǵaltqyshtardy jóndeý jáne qyzmet kórsetý», «Jelilik jáne júıelik ákimshi», «Aýyl sharýashylyǵy mashınalary men traktorlarynyń slesar-jóndeýshisi», «Mehatronıka», «Elektromontaj jumystary», «Vızýal merchandaızıng jáne vıtrınıstıka», «Jeńil kólikterdi jóndeý jáne qyzmet kórsetý», «Santehnıka men jylý berý», «Meıramhana qyzmeti», «CAD ınjenerlik grafıkasy», «Kólik syrtyn jóndeý», «Mobıldi robot tehnıka», «Shashtaraz», «Sán tehnologııasy», «Bıdaı men bıdaı ónimderi sapasyn anyqtaý», «Dánekerleýshi», «Taqta qaptaý», «Qurǵaq qurylys jáne sylaq», «Aspaz», «Naýbaı», «Salqyndatqysh jáne jeldetkish quraldary», «Bıznestiń IT sheshimderi» biliktilikteri boıynsha ótýde.
Aıta ketetin taǵy bir jaıt, byltyr qazaqstandyq jas sheberler WorldSkills-2017 baıqaýyna qatysý úshin Abý-Dabıge barǵan edi. Bıyl kúzde Qazaqstan quramasy Býdapeshtte ótken EuroSkills saıysynda 10-oryn aldy.
Raýan QAIDAR,
«Egemen Qazaqstan»
