Aýyl turǵyndarynyń osy qýanyshyna Batys Qazaqstan oblysynyń ákimi Altaı Kólginov ortaqtasty.
- Búgingi tapsyrylyp otyrǵan jańa úı – Batys Qazaqstan oblysynyń aýdandarynda bıyl «Nurly jol» baǵdarlamasy boıynsha boı kótergen 104 úıdiń biri. Al oblys boıynsha jańadan 3500 páter salynyp jatyr. Biz jaqynda Tuńǵysh Prezıdent merekesine oraı Oral qalasynda 120 páterlik úıdi bergen bolatynbyz. Jaqyn ýaqytta taǵy toǵyz qabatty eki úı paıdalanýǵa beriledi. Dál osy Jalpaqtaldy aıtatyn bolsaq, 3-4 jyl buryn munda jol joq edi, aýdan ortalyǵynda ortalyqtandyrylǵan sý joq edi. Qazir ekeýi de keldi. Aýyl ishinde bıyl Syrym Datuly, Másálımov kósheleri jóndeldi. Balabaqsha kúrdeli jóndelip, sý jańa keıipke endi. Munyń bári – memlekettiń kómegi, turǵyndarǵa degen qamqorlyǵy. Bul aldyn ala josparlanǵan, júıeli, úlken jumys, - dedi óz sózinde Altaı Kólginov.
О́ńir basshysy kelesi aptada Oral qalasyn Reseıdiń Saratov qalasy baǵytyna shyǵatyn shekaraǵa deıingi 104 shaqyrymdyq jol qurylysy aıaqtalatynyn, aldaǵy ýaqytta Samara men Orynbor baǵytyndaǵy avtokólik joldary da kúrdeli jóndeletinin habarlady. Al óńirdiń ońtústik aýdandary turǵyndary zaryǵa kútip otyrǵan Bókeı ordasy men Jánibek joly jaz shyǵa bastalady. Keler jyly Qaztalovqa jol jetedi, odan ári Jánibek, Han ordasy, Saıhyn aýyldaryna jol tartylady.
- Jol salynǵan soń bul aýdandardyń ekinshi tynysy ashylady, aǵaıyndardyń bir-birimen aralasýy artady. Alda turǵan jospar kóp. Bıyl osy Qaztalov aýdanynda 13 eldi mekenge gaz berip bastadyq. 13 aýylǵa taza aýyz sý qubyry tartyldy. Dál qazir Jalpaqtalda gaz da bar, sý da bar, jol da, ınternet te bar. Bizdiń aıtylǵan josparymyz jerde qalmaı, bári de oryndalyp jatyr. Bolashaqta da solaı bolady. Alda kele jatqan Táýelsizdik merekesi qutty bolsyn, - dedi Altaı Kólginov.
– Men Jalpaqtaldaǵy agrarlyq jáne salalyq tehnologııalar kolledjinde oqytýshymyn. Búgin páter kezegi boıynsha jańa baspanaǵa qolym jetip otyr. Osy qýanyshyma sebepker bolǵan Elbasyǵa, oblys basshylaryna jáne qurylysshylarǵa alǵysym sheksiz. Úıimiz kirse shyqqysyz, uıadaı jyly, gazy, sýy ishinde – qaladaǵydaı bir de kem emes, - deıdi qonystoı ıeleriniń biri Aıgúl О́tebálıeva.
Eki qabatty, 12 páterlik turǵyn úı qurylysy Jalpaqtalda bıylǵy shilde aıynda bastalǵan edi. Ol úshin oblystyq bıýdjetten 132,5 mln. teńge bólingen. Jańa úıdiń jalpy jalpy aýmaǵy 730 sharshy metr. Qurylysty júrgizgen «Evrıka» JShS mamandary úıdi jospardaǵy 5 aıdyń ornyna 4 aı ishinde salyp úlgergen.
– Biz qurylysty tym sýyqqa qalmaı, erterek aıaqtaýǵa tyrystyq. Biraq sapasyna da erekshe kóńil bóldik. Jalpy qurylysqa 3 myń tonnadan artyq materıal ketti. Aıta keteıin, úı qurylysyna paıdalanǵan materıaldyń bári de jergilikti kásiporyndardyń ónimi. Taǵy bir ereksheligi, jylý júıesin ár páter ıesi ózi retteı alady. Jergilikti 15 adamdy qurylys jumysyna tarttyq, - deıdi merdiger kompanııa basshysy Oleg Tetero.
Qazbek QUTTYMURATULY,
«Egemen Qazaqstan»
Batys Qazaqstan oblysy
Sýretti túsirgen Temirbolat Toqmámbetov
