Syr óńirinde otbasymen jáne búgingi qoǵamnyń damyp, órkendeýine ár salada júrip óziniń úlesin qosqan 35 áıel-anaǵa «Ǵasyr-Ana», «Úzdik bilim qyzmetkeri», «Úzdik medısına qyzmetkeri», «Úzdik fermerlik jáne sharýa qojalyǵynyń basshysy», «Úzdik poshta nemese óndiris qyzmetkeri», «Úzdik saýda jáne qyzmet kórsetý salasyndaǵy shaǵyn jáne orta bıznes basshysy» nomınasııalary boıynsha oblys ákimi atynan dıplomdar berildi.
Forýmda "Urpaqtan-urpaqqa" qoǵamdyq birlestiktiń jetekshisi A. Bojanova, Jańaqorǵan aýdany, Keden aýyldyq okrýgine qarasty Aqqum aýylynyń turǵyny, II top múgedegi, qolónershi Oral Qasıet sóz sóıledi. "Aýyl áıeliniń bir kúni" degen taqyryppen Jalaǵash aýdanynyń turǵyny, malshy Q. Qanatbaeva jóninde beınerolık kórsetildi.
- Bıylǵy jyly Qyzylorda oblysynda jappaı kásipkerlik damytý jyly dep jarııalandy. Onyń kásipkerlerimizdiń jumysyn tıimdi júrgizýine septigi tıgendikten, oblys ákimi buny ári qaraı úsh jylǵa sozý jóninde sheshim qabyldady. Bul rette, óńirlik kásipkerlikti damytý úshin bıýdjeti 32 mlrd. teńgeni quraıtyn keshendi Jol kartasy ázirlendi. «Start-ap» jobalarǵa 3,0 mlrd. teńge bólindi. Onyń ishinde, aýyldyq jerde aýylsharýashylyq keshenin damytýǵa 8,8 mlrd.teńge qarjy qarastyrylǵan. 2017 jyly eki myńnan astam jeke qosalqy sharýashylyqty biriktirip, 80 koooperatıv quryldy. О́ńirlik ınvestısııalyq ortalyq arqyly oblystyq bıýdjetten shaǵyn nesıege 1 mlrd. teńge bólinip, búgingi tańda 258 joba qarjylandy. Onyń ishinde 112 joba áıel kásipkerlerge tıesili. Sonymen qatar, «Aýyl sharýashylyǵyn qoldaý qory» Qyzylorda fılıalynan 2017-2018 jyldar aralyǵynda 2,4 mlrd. teńgege 760 nesıe áıel kásipkerlerge berildi. Qazir tabysty bıznesti júrgizý úshin jaqsy jaǵdaı bar. Tek jumys isteý, tájirıbe almasý jáne qıyndyqtardan qoryqpaý kerek, - dedi forým jumysyn júrgizip otyrǵan Qyzylorda oblysy ákimi orynbasary, oblystyq áıelder isteri jáne otbasylyq-demografııalyq saıasat jónindegi komıssııa tóraǵasy Rýslan Rústemuly.
Qyzylorda oblysy boıynsha 2018 jyldyń 1 qazanyna «Eńbek» nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasyna 27741 qatysýshy engizilse, onyń ishinde áıelderdiń menshikti salmaǵy 47,4 paıyzdy quraǵan eken.
Baqtııar TAIJAN,
«Egemen Qazaqstan»
Qyzylorda oblysy
