Úlken sharaǵa qatysqandardy quttyqtaǵan Qyzylorda oblysynyń ákimi Q.Kósherbaev «Baıqońyr Invest» forýmy tabysty áriptestik ornatý alańyna aınalǵanyn atap ótti.
- Memleket basshysynyń Joldaýynan týyndaıtyn balamaly energetıkany damytý jónindegi mindetterdi oryndaý maqsatynda biz búgingi «jasyl» ekonomıkaǵa - óńir damýynyń jańa baǵyty retinde arnadyq. Bizdiń oblysymyz kúnniń belsendiligi joǵary aımaq ekenin atap ótkim keledi. Oblysta kún sáýlesiniń ortasha jyldyq uzaqtyǵy 3 myń saǵattan artyq. Bul kún elektr stansııalaryn salý men damytý úshin úlken múmkindik. Sondyqtan «Jasyl» ekonomıka taqyrybyn biz kezdeısoq tańdap alǵan joqpyz, - dedi ol.
Oblys ákimi kelesi jyly óńirde jalpy qýaty 170 mVt bolatyn 4 kún elektr stansııasynyń qurylysy bastalatyndyǵyn aıtty. Qýaty 60 jáne 10 MVt bolatyn Qyzylorda qalasynyń sol jaǵalaýynda jáne Jańaqorǵan aýdanynda "HydroEnergy" AQ (Bolgarııa), Jalaǵash aýdanynda qýaty 30 mVt – "Total Eren" (Fransııa) kompanııasy, Shıeli aýdanynda qýaty 70 mVt – "Samruk Kazyna – United Green" kompanııasy jáne "Avelar Solar Tehnolodjı" JShQ (Reseı) kún elektr stansııasyn salatyn bolady.
Forýmnyń plenarlyq otyrysynda dıplomatııalyq mıssııa ókilderi, memlekettik organdar men qarjy ınstıtýttarynyń basshylary sóz sóıledi. QR Investısııalar jáne damý mınıstrligi Investısııa komıtetiniń tóraǵasy Erlan Qaıyrov Qyzylorda oblysyndaǵy negizgi kapıtalǵa salynǵan ınvestısııa ósiminiń oń trendterin atap ótti. Sondaı-aq, aımaqtyń óńdeý ónerkásibinde 1,9 esege óskenin aıtty. Nátıjesinde, óńir salanyń negizgi kapıtalyna ınvestısııalardyń ósý qarqyny boıynsha kóshbasshylardyń úshtigine endi.
Baqtııar TAIJAN,
«Egemen Qazaqstan».
Qyzylorda oblysy
