Sharany Dúnıejúzi qazaqtary qaýymdastyǵy (DQQ) Tóraǵasynyń birinshi orynbasary Zaýytbek Turysbekov ashyp beredi. Sheteldik otandastarǵa arnaıtyn alǵysózinde ol tarıhı otannyń qazirgi jaǵdaıy, áleýmettik-ekonomıkalyq jáne qoǵamdyq-saıası damýyndaǵy jetistikteri týraly aıtyp, DQQ men «Otandastar» Qorynyń birlesken qyzmeti jaıynda aqparat beredi. О́tken jyly Elbasy tapsyrmasymen qurylǵan «Otandastar» Qorynyń maqsat-mindetteri týraly Qordyń Vıse-prezıdenti Talǵat Adýov aıtady. Ol Memleket basshysynyń «Rýhanı jańǵyrý» baǵdarlamalyq maqalasynda aıtylǵan ulttyq biregeılikti saqtaýǵa baǵyttalǵan Qordyń josparly jobalaryna erekshe toqtalyp ótedi.
«Qasıetti Qazaqstan» ǵylymı-zertteý ortalyǵy Dırektorynyń orynbasary Batyrhan Jumabaev óz baıandamasynda rýhanı qundylyqtardy saqtaýdyń, qasıetti tarıhı jerlerdi zertteý men nasıhattaýdyń, Qazaqstannyń mádenı-týrıstik klasterlerin damytýdyń mańyzdylyǵy týrasynda sóz qozǵaıdy. Memlekettik tildi damytý Qorynyń Dırektory Azat Sháýeev otandastardy ózi basqaryp otyrǵan Qordyń jobalarymen tanystyryp, qazaq tilin meńgerýge arnalǵan qoljetimdi tegin mobıldi qosymshalar, onlaın-kýrstar jáne ınternet-resýrstar týraly tolyq aıtyp beredi.
Quryltaıda Reseıdegi qazaq dıasporasynyń ana tilinde bilim alýy, mádenı-rýhanı muralardy zertteýi jáne iskerlik damýy turǵysynda qoldaý kórsetetin jobalardy iske asyrýdyń negizgi baǵyttaryn talqylaý josparlanyp otyr. Shara qazaqstandyq ártisterdiń qatysýymen ótetin gala-konsertpen aıaqtalady.
Reseıdegi qazaqtardyń sany shamamen 1 mıllıon adamdy quraıdy. Kópshiligi Qazaqstanmen shekaralas aımaqtarda turady. Eń iri qazaq dıasporalary Astrahan, Orynbor, Omsk jáne Saratov oblystarynda ornalasqan. Reseı halyq sanaǵy boıynsha qazaqtar tatar, bashqurt, shýas syndy túrki etnostarynan keıin tórtinshi jáne Reseıdiń jalpy etnostary ishinde onynshy bolyp tur.
Shetelde turatyn qazaqtardyń kishi quryltaılary jyl saıyn Qazaqstannyń Qoǵamdyq damý Mınıstrligi qoldaýymen ótkiziledi. Shara qazaq dıasporalarynyń tól mádenıetin, dástúrleri men ádet-ǵuryptaryn saqtap qalýyna baǵyttalǵan.
