Jıyndy ashqanAqparat jáne kommýnıkasııalar mınıstri Dáýren Abaev: «Búginde qazaqtildi saıttardyń sany da, salmaǵy da artyp keledi. Ýaqyt talabyna saı óz aýdıtorııasyn qalyptastyrǵan básekege beıim portaldardyń qarasy kóbeıip jatyr. Osy qarqyn jalǵassa, memlekettik tilimizdiń mártebesi ósedi», deı kelip, qazaqtildi resýrstardyń sapasyn odan ári arttyrý máselesine toqtaldy.
Mınıstr búginde otandyq aqparat quraldarynyń memleket saıasatyn xalyqqa der kezinde ońtaıly jetkizip otyrǵanyn atap ótti.
«Halyq Elbasynyń «Bolashaqqa baǵdar: rýxanı jańǵyrý» jáne «Uly dalanyń jeti qyry» syndy baǵdarlamalyq maqalalarynyń maǵynasyna tereń úńildi. Osyndaı aýqymdy jumysty atqarǵandaryńyz úshin Aqparat jáne kommýnıkasııalar mınıstrligi atynan sizderge alǵys aıtamyz. Qazirgi kúni álem jedel qarqynmen ózgerý ústinde. Soǵan saı aqparattyq tehnologııalar túrli baǵyttar boıynsha jan-jaqty damyp jatyr. Sol sebepti aýdıtorııaǵa qyzyqty kontent, oqyrmanǵa tartymdy portal qalyptastyrý – búgingi zaman talaby. Qazir qazaqtildi saıttardyń óz baǵyty qalyptasyp keledi. Osy jaıt kóńilge qýanysh uıalatady. Búginde naqty deregi bar qysqa da nusqa aqparat qundy. Osydan on jyl buryn biz sózi ótimdi qazaqtildi saıttar bolsa eken dep oılaıtynbyz. Qazir ondaı saıttar jeterlik. Endi, sol resýrstardyń sapasyn kúsheıtýimiz qajet», dedi mınıstr.
Jıynǵa qatysqan qazaqstandyq tanymal veb-saıttar men medıa-bıznes ókilderi aqparat quraldaryn zamanǵa saı damytý máselelerin talqylady.
«Qazaq ınterneti salasynda ne ózgerdi, ne jańalyq bolyp jatyr, osyny talqylaý múmkindigi paıda bolǵandyǵy qýantady. Bul kezdesýimizdiń ózi qazaq ınternetiniń qarqyndy damýynyń kórinisi. Búginde televızııa nemese ınternet dep bólýge kelmeıdi. «Qazaqstan» teleradıokorporasııasy da qazaq ınternetinde kontent jasaýshylardyń biri. Bizdiń ónimderimizdi xalyq áleýmettik jeliler arqyly qalaı qarasa, «Qazaqstan TV» mobıldi qosymshasy arqyly da erkin tamashalaı alady. Bul qosymsha shilde aıynda daıyndaldy. Osy 4-5 aıdyń ishinde 500 myńnan astam adam júktep aldy. Iаǵnı, qazaqtildi aýdıtorııa búgingi tańda ınternettegi negizgi tutynýshylardyń biri bolyp otyr», dedi «Qazaqstan» RTRK» AQ basqarma tóraǵasy Erlan Qarın.
Bıyl uıymdastyrýshylar qazaqtildi saıttarǵa ǵana kóńil aýdaryp qoımaı, áleýmettik jeliler, messendjerler jáne basqa da zamanaýı ınternet-platformalardaǵy kontent máselesin de talqylady.
«Men qazaqtildi kontent jasaýshylar forýmyn medıa naryǵy úshin mańyzdy is-shara dep esepteımin. Ol mańyzdy baǵyttarǵa nazar aýdartyp, kókjıekti keńeıtedi, qazaqstandyq jýrnalısterge syn-tegeýrinder men múmkindikterge daıyn bolýǵa kómektesedi», dep atap ótti AQSh-tyń Qazaqstandaǵy Ýaqytsha Senimdi О́kili Teodor Lıng.
Forýmnyń birinshi sessııasynda kontentti basqarýǵa arnalǵan zamanaýı tehnologııalar jaıly sóz qozǵaldy. Qatysýshylar qazaqsha kontentti shyǵaryp qana qoımaı, ony basqarý da qajet ekenin atap ótti. Osy oraıda «Qazkontent» AQ basqarma tóraǵasy Dýman Qojahmetov, 7kun.kz iskerlik jańalyqtar saıtynyń negizin qalaýshy Erbol Azanbek, «Baribar» saıtynyń negizin qalaýshy Erbol Serikbaı, «Balapan» telearnasynyń dırektory Maqpal Jumabaı jáne qazaqstandyq saıasattanýshy Aıdos Sarym óz ıdeıalarymen jáne pikirlerimen bólisti.
«Qazirgi «Z» urpaq, tórtinshi ındýstrııalyq revolıýsııa ókilderi, álemdik jáne elimizdegi jaǵdaıdy aqparattyq saıttar arqyly teń qarastyra alady. Aýdıtorııa tarapynan memlekettik tilde ázirlenetin kontentke suranys kúndelikti ósip otyr. Sondyqtan qazaq tilindegi kontentti sapaly damytý – bizdiń maqsatymyz», dedi «Balapan» telearnasynyń dırektory M.Jumabaı.
Ekinshi paneldi sessııa aqyldy jýrnalıstıkaǵa, zamanaýı analıtıka quraldaryn tabysty túrde qoldanýǵa, onlaın-tehnologııalar men úderisterdi avtomattandyrýǵa arnaldy. Nur.kz ınternet-portalynyń bas redaktory Pavel Prıtchın, «Informburo» jańalyqtar saıtynyń bas redaktory Mıhaıl Dorofeev, «Galamattech» JShS bas dırektory Abaı Serǵazıev, «Analıtıka jáne BigData qaýymdastyǵynyń» prezıdenti ári kásipker Sergeı Ahmetov, «Atameken» UKP IT-keńesiniń tóraǵasy Mırýs Qurmashev óz keısterimen jáne tájirıbelerimen bólisti.
Forým aıasyndaǵy qorytyndy sessııada BTS digital kompanııasy bilim berý ortalyǵynyń bastyǵy Saıasat Nurbek, IT-analıtık jáne medıa-jattyqtyrýshy Tımýr Bektur, «Egemen Qazaqstan» RG» AQ Basqarma tóraǵasynyń orynbasary – bas redaktor Aıbyn Shaǵalaq, marketolog jáne Yuframe shyǵarmashylyq birlestiginiń negizin salýshy Rasýl Abdýllaev jáne jýrnalıst ári medıa-trener Ashat Erkimbaı medıa salasynyń bolashaǵy jaıly oılarymen bólisti.
Marjan TILEÝBEK,
«Egemen Qazaqstan»
